Read Mizo_Old_version Sam 97 Bible Online

Sam 97 - Mizo_Old_version bible

Sam 97

¹ LALPA chu lalah a ṭhu a; lei hi hlim takin awm sela; Thliarkâr tam takte chu lâwm takin awm rawh se.

²Chhûmte leh thim chhah mup chu a vêlah a awm a; Felna leh rorêlna fel chu a lalṭhutthlêng nghahchhan a ni.

³A hma lamah chuan mei a kal a, A vêla amah dotute chu a kâng ral ṭhîn.

⁴A kâwlphete chuan khawvêl hi a ên zawk zawk a; Lei hian a hmu a, a khûr a.

⁵Tlângte chu khawihnûn ang hian LALPA hmaah a tui ral ta a, Khawvêl zawng zawng LALPA hmaah chuan.

⁶Vânte khian a felna chu a tlângaupui ṭhîn a, Mi tinrêng chuan a ropuizia an hmu ta a.

⁷Milem siam chawp rawngbâwltu zawng zawng chu mualphovin awm rawh se, Milem chhuangtute chu. Nangni pathian zawng zawngte u, amah chu chibai bûk rawh u.

⁸Zion tlâng chuan a hria a, lâwm takin a awm a, Juda fanute chu hlim takin an awm bawk a, Aw LALPA, i rorêlnate avângin.

⁹ LALPA, nang chu leilung zawng zawng chungah hian chungnung ber i ni si a; Nang chu pathian zawng zawng chung daihah chawimawiin i awm a.

¹⁰Aw, LALPA hmangaihtute u, sual haw rawh u. Ani chuan a mi thianghlimte nunna chu a vawng ṭha ṭhîn a; Anni chu mi suaksualte kut ata a chhanhim ṭhîn.

¹¹Mi felte tân khua a lo êng a, Thinlung dikte tân lâwmna a lo thleng.

¹²Mi felte u, LALPA-ah lâwm takin awm ula; A hming thianghlim chu fak rawh u.