Read Mizo_Old_version Sam 98 Bible Online

Sam 98 - Mizo_Old_version bible

Sam 98

¹Aw, LALPA chawimawiin hla thar sa rawh u; Thil mak takte a ti ta si a; A kut ding lam leh a bân thianghlim chuan a tân chhandamna a siamsak ta a.

² LALPA chuan a chhandamna chu a hriattîr a; A felna chu hnam tin mit hmuhah chuan fiah takin a lantîr ta a.

³Israela chhûngte chunga a ngilneihzia leh a rinawmzia chu a hre reng a; Kâwlkila mi zawng zawng pawhin kan Pathian chhandamna chu an hmu ta a.

⁴Leilung luah zawng zawngte u, LALPA chawimawiin hlim takin au ula; Au chhuak ula, hlimin zai rawh u, a ni, fakna hla sa rawh u.

⁵Ṭingṭang nên LALPA fakin zai rawh u, Ṭingṭang leh fakna hla thâwm nên.

⁶Tawtawrâwtte leh tawtawrâwt bi nei ri nên, Lalber, LALPA hmaah chuan, hlim takin au rawh u.

⁷Tuifinriat leh a chhûnga thil awm zawng zawng hi ri hum hum rawh se; Khawvêl leh a chhûnga chêngte nên hian.

⁸Luipuite chuan an kut bêng sela; Tlângte chu hlimin zai ho rawh se,

⁹ LALPA hmaah chuan, lei rorêl tûrin a lo kal dâwn si a. Khawvêl hi fel takin ro a rêlsak ang a, Thlei bîk nei lovin mi tin ro chu a rêl ang.