Read Mizo_Old_version Thufingte 1 Bible Online

Thufingte 1 - Mizo_Old_version bible

Thufingte 1

¹Israel lal Davida fapa Solomona thufing:

²Finna leh zirtîrna hriat theihna tûr te, Hriat thiamna thu ngaihruat dân thiamna te,

³Felna te, rorêl te, hleih nei lova hmanghre taka zirtîrna pawm dân thiamna te;

⁴Mi mâwlte remhriatna neihtîr tûr te, Tlangvâlte hriatna leh ngaihruat thiamna neihtîrna tûr leh,

⁵Mi fingten an hriata, an thiamna te a lo puna, Thil ngai thiam miin rorêlna fingte a man thiamna tûr te,

⁶Thufing leh a hrilhfiahna te, mi fing thu leh an thu ril sawite hriat thiamna te chu.

⁷ LALPA ṭih hi finna bul a ni a; Nimahsela, mi âte chuan finna leh zirtîrna an hmusit ṭhîn.

⁸Ka fapa, i pa zirtîrna che chu ngaithla la, I nu zirtîrna che chu hawisan suh;

⁹I lu atân pârṭhi mawi tak a ni ang a, I nghâwng atân ṭhi ang a ni dâwn si a.

¹⁰Ka fapa, mi sualin an thlêm che chuan zâwm suh.

¹¹“Hawh teh, thisen chhuah tûrin i châng ang khai, A vâng eng mah awm lovin pawi khawih lote chu i châng ru teh ang;

¹²Seol angin a nung chungin i lem teh ang, An puma khuarkhuruma tla angin;

¹³Thil hlu tak takte kan nei ang a, Râllâk sumin kan in kan tikhat dâwn nia.

¹⁴Kan zîngah lo tel ve la, Tangka ip kan in ṭâwm dâwn nia,” te an tihin,

¹⁵Ka fapa, an zîngah chuan tel ve suh la, An kawng ata inthiarfihlîm rawh;

¹⁶An kete chu thil sual lamah a tlân a, Thisen chhuah tûrin an hmanhmawh ruai ṭhîn.

¹⁷Lên chu a lothlâwn maia zâr a ni, Eng sava mit hmuhah pawh;

¹⁸Chûngte chuan anmahni thisen an châng a, An nunna châng ru an ni.

¹⁹Chutiang chu a ni hlâwknaa duhâm apiangte kawng chu; A neitute nun a lâksak ṭhîn.

²⁰Kawtthlêrah finna chu ring takin a au va, Kawtthlêr ṭhuamahte chuan a aw a chhuah a;

²¹Mipui inkhâwmna lai takah a au va, Khawpuiah, khaw luhna kawngkhâr bulah chuan a au chhuak a:

²²“Nangni mi mâwlte u, eng chen nge mâwlna in ngainat dâwn? Eng chen nge hmusittute hmuhsitnaah in hlim anga, Mi âten finna in huat dâwn?

²³Ka zilhna che u lamah hian lo hawi rawh u; Ngai teh u, in chungah ka thlarau ka leih ang a, Ka thu ka hriattîr ang che u.

²⁴Ka ko che u a, in duh lo va, Ka kut ka phar a, tu mân in ngaisâng lo va;

²⁵Ka remruat zawng zawng chu engmahlovah in ngai zâwk a, Ka zilhna rêng rêng in pawm duh lo va;

²⁶Chuvângin, kei pawh in vânduai ni chuan ka nui ang a, In hlauh hun a lo thlen chuan ka nuihsan ang che u,

²⁷In hlauhna thlipui anga a lo thlena, In vânduaina ṭhâwngaleivir anga a lo thlena, Hrehawmna leh manganna in chunga a lo thlen hunin.

²⁸Chutichuan, mi ko vang a; nimahsela, ka chhâng lo vang; Zîng takah mi zawng ang a; nimahsela, mi hmu lo vang.

²⁹Hriatna chu an huata, LALPA ṭihna chu an thlan loh avângin;

³⁰Ka remruat pakhat tê mah an duh lo va, Ka zilhna zawng zawngte chu an ngainêp a;

³¹Chuvângin, anmahni kawng rah chu an ei ang a, Anmahni suangtuahnain an tlai ang.

³²Mi mâwlte hnungtawlhna chuan anmahni a that ang a, Mi âte hlawhtlinnain anmahni a tiboral ang.

³³Ka thu pawm apiangte erawh chu him takin an awm ang a, Thil ṭha lo hlau lovin an awm hle hle ang.”