Read Mizo_Old_version Thufingte 10 Bible Online

Thufingte 10 - Mizo_Old_version bible

Thufingte 10

¹Solomona thufing. Fapa fingin pa lâwm a siam a, Fapa â erawh chu nu rihna a ni.

²Suahsualna ro chuan hlâwkna a nei lo va, Felna erawh chuan thihna ata a chhanchhuak.

³ LALPA chuan mi fel nunna chu rilṭâm a phal lo vang a, Mi suaksualte duhthusâm erawh chu a paih bosak ṭhîn.

⁴Kut dâwngdah chuan retheihna a thlen ṭhîn a, Mi taima kut erawh chuan hausakna a thlen ṭhîn.

⁵Buh seng laia inchhêk khâwl chu fapa fing a ni a; A seng hun laia muhîl erawh chu fapa, Mualphona thlen ṭhîntu a ni.

⁶Mi fel lu-ah chuan malsâwmnate a awm a, Mi suaksual ka erawh chu nunrâwnnain a tuam.

⁷Mi fel hriat rengna chu malsâwmna a ni a, Mi suaksual hming erawh chu a ṭawih ral ang.

⁸Mi fing chuan thinlungin thupêkte a dawng ṭhîn a, Mi â kamtam erawh chu a tlu ang.

⁹Ngîl taka kal chu muanawm takin a kal ṭhîn a, A kawng tikhawlotu erawh chu hriat chhuahin a awm ang.

¹⁰Mit siaitu chuan lungngaihna a thlen a, Mi â kamtam chu a tlu ang.

¹¹Mi fel kâ chu nunna tuikhur a ni a, Mi suaksual ka erawh chu nunrâwnnain a tuam;

¹²Huatnain inhauna a chawk chhuak a, Hmangaihna erawh chuan bawhchhiatna zawng zawng a khuh ṭhîn.

¹³Ngaihruat dik thiam mi kaah chuan finna hmuh a ni a; Amaherawhchu, hriat thiamna nei lo mi hnungzâng atân tiang a awm.

¹⁴Mi fingte chuan hriatna an khâwl khâwm a; Mi a ka erawh chu boral hnaih rengna a ni.

¹⁵Mi hausa sum chu a khawpui nghet a ni a; Mi rethei boralna chu an pachhiatna a ni.

¹⁶Mi fel thawh rimna chuan nunna a thlen a, Mi suaksual hlâwkna chuan sualna.

¹⁷Thununna pawm chu nunna kawngah a awm a, Zilhhauna hawisantu erawh chuan a tisual ṭhîn.

¹⁸Huatna zêptu chu hmui dawthei nei mi a ni a, Mi rêlna thu chhâk chhuak mi chu mi â a ni.

¹⁹Thu tam takah chuan bawhchhiatna a awm ṭhîn a, A ka sûm thei mi erawh chuan fing takin a ti ṭhîn.

²⁰Mi fel lei chu tangkaraw ṭha mi ang a ni a, Mi suaksual thinlung erawh chu eng hû mah a ni lo.

²¹Mi fel ka chuan mi tam tak a châwm a, Mi â erawh chu hriat thiamna tlachhamin a thi.

²² LALPA malsâwmna chuan a tihausa ṭhîn a, Lungngaihna a belhchhah ṭhîn lo.

²³Mi â tân chuan thil sual tih hi nuamsip bâwlna ang a ni a, Chutiang bawk chuan hriat thiamna nei mi tân chuan finna chu a ni.

²⁴Mi suaksual chu, a hlauh ang ngeiin a chungah a lo thleng ang; Mi fel duhthusâm chu pêk a ni ang.

²⁵Ṭhâwngaleivir a lo virin mi suaksual chu a boral a, Mi fel erawh chu chatuan lungphûm a ni.

²⁶Ha tân uain thûr leh mit tân meikhu angin, Mi thatchhia chu a tîrtu tân a ni ang.

²⁷ LALPA ṭihna chuan dam chhûng ni a tisei a; Nimahsela, mi suaksual kumte chu tihtawi a ni ang.

²⁸Mi fel nghahfâk chu lâwmna a ni ang a, Mi suaksual hmachhuan erawh chu a boral ang.

²⁹Mi dik tak tân LALPA kawng chu kulhbîng a ni ang a, Thil ṭha lo titu tân erawh chuan boralna a ni ang.

³⁰Mi felte chu tihsawnin an awm lo vang a, Mi suaksualte erawh chu leilungah an awm lo vang.

³¹Mi fel ka chuan finna a chhâk chhuak a, Ṭawng chaltlai lei erawh chu tan chhum a ni ang.

³²Mi fel ka chuan pawm tlâk chu a hria a, Mi suaksual ka erawh chu chaltlai takin a ṭawng chhuak ṭhîn.