Read Mizo_Old_version Thufingte 11 Bible Online

Thufingte 11 - Mizo_Old_version bible

Thufingte 11

¹Bûkna dik lo hi LALPA mit hmuhin thil tenawm a ni a, Khîn dik chiah erawh chu a lâwm zâwng a ni.

²Chapona a lo awmin mualphona a lo awm a, Inngaitlâwmte hnênah chuan finna a awm.

³Mi fel rilru ṭhatna chuan anmahni a hruai ang a, Mi vervêkte luhlulna erawh chuan anmahni a tiboral ang.

⁴Thinur ni chuan sum leh paiin ṭangkaina a nei lo vang a, Felna erawh chuan thihna ata a chhanchhuak ang.

⁵Mi ṭha famkim felna chuan kawng a kawhhmuh ang a; Mi suaksual erawh chu ama suahsualnain a titlu ang.

⁶Mi dik tak felna chuan anmahni a chhanchhuak ang a, Vervêk taka titute erawh chu anmahni pawi khawihna ngeia manin an awm ang.

⁷Mi suaksual chu a thihin a hmachhuan chu a boral ang a, Thil ṭha lo titute nghahfâk chu a boral ang.

⁸Mi fel chu manganna ata chhuahin a awm a, Mi suaksualin a hmun chu a luah thung a,

⁹Pathian ngaihsak lo mi chuan a kain a ṭhenawmte a tiboral a, Mi fel erawh chu hriatna avângin chhanchhuahin a awm ang.

¹⁰Mi felte chunga thil a tluan laiin khua a hlim a, Mi suaksualte an thihin au dur durna a awm ṭhîn.

¹¹Mi felte malsâwmnain khua chawimawiin a awm a, Mi suaksualte ka erawh chuan a tichhia.

¹²A ṭhenawm hmusittu chuan finna a nei lo va, Hriatna nei mi erawh chu a ngawi ṭhîn.

¹³Mi kamtam tei ruai mi chuan thurûkte a tilang a, Mi rilru rinawm nei mi chuan thil a thup ṭhîn.

¹⁴Inhruaina fing awm lohnaah chuan mite an tlu ṭhîn a, Remruat thiam tamnaah himna a awm.

¹⁵Tu pawh ramdangmi tâna mawhphurtua insiam chuan lungngaihna a insiam ang a, Mawhphurtua insiam hawtu erawh chuan ngaihngam taka awmna a nei.

¹⁶Hmeichhe ṭha chuan zahawmna a chang ang a, Pâwng lâk chîng mi chuan sum a chang ang.

¹⁷Zahngai thei mi chuan ama nunna atâna ṭha a ti ṭhîn a, Mi nunrâwng erawh chuan ama tisa buaina a thlen ṭhîn.

¹⁸Mi suaksual chuan bumna hlawh a dawng ṭhîn a, Felna tuhtu erawh chuan a tak tak hlawh a dawng ṭhîn.

¹⁹Felnaa nghet taka ding mi chuan nunna a chang ang a, Thil sual ûmtu chuan ama thihna.

²⁰Mi rilru bawlhhlawhte chu LALPA tâna tenawm an ni a, An kawnga mi fel famkimte erawh chu a lâwm zâwng an ni.

²¹Inthurual mah sela, mi suaksualte chu hrem lohvin an chhuak lo vang a, Mi fel thlahte erawh chu chhanchhuahin an awm ang.

²²Hmeichhe hmêlṭha, ngaihruat thiamna nei lo chu, Vawk hnâra rangkachak khâng vuah ang a ni.

²³Mi fel duhthusâm chu thil ṭha chauh a ni a, Mi suaksual hmachhuan erawh chu thinurna a ni.

²⁴Sem darh chu pun lehzualna a ni a, Mamawh tâwk aliam kawmpui chu tlâkranna a ni.

²⁵Mi thilphal nunna chu tihthauvin a awm a, Tui leih ṭhîntu chuan mahni pawh a inleih a ni.

²⁶Buh kawmpuitu chu miin ânchhia an lawh ang a, A zuartu lu chungah erawh chuan malsâwmna a awm ang.

²⁷Ṭhahnemngai taka ṭhatna zawngtu chuan duhsakna a zawng a ni a; Pawi khawih tûr zawngtu erawh chu, ama chungah a thleng ang.

²⁸A sum ring mi chu a vuai ang a, Mi fel erawh chu hnim angin a duah ang.

²⁹Mahni chhûngkua tibuaitu chuan thli a rochung ang a, Mi â chu mi thinlung fing chhiahhlawhah a awm ang.

³⁰Mi fel rah chu nunna thing a ni a, Mi fing chuan mi rilru a hneh ṭhîn.

³¹Ngai teh, mi fel mah leiah hian thungrulh an nih chuan, Mi suaksual leh thil tisualtu chu eng ang taka nasa lehzual ni ang maw!