Read Mizo_Old_version Thufingte 12 Bible Online

Thufingte 12 - Mizo_Old_version bible

Thufingte 12

¹Thununna ngaina mi chuan hriatna a ngaina ṭhîn a, Zilhhauna haw mi erawh chu ramsa ang mai a ni.

²Mi ṭha chuan LALPA duhsakna a hlawh ang a, Suahsualna rilru pu mi erawh chu thiam loh a chantîr ang.

³Mihring chu suahsualnain tihngheh a ni lo vang a; Amaherawhchu, mi fel dinhmun chu a nghîng lo vang.

⁴Hmeichhe khawsak ṭha chu a pasal tân lallukhum a ni a, Zahpuiawm tak thil ti erawh chu a ruh timawihtu a ni.

⁵Mi fel ngaihtuahnate chu a fel a, Mi suaksualte remruat erawh chu bumna a ni.

⁶Mi suaksual ṭawngkam chu thisen chhuah tûra chânna a ni a, Mi dik tak ka erawh chuan anmahni a chhanchhuak ang.

⁷Mi suaksualte chu paih thlâkin an awm a, an bo ṭhîn a, Mi fel chhûng erawh chu an awm reng ang.

⁸Mi a fin dân ang zêla fakin a awm ang a, Mi luhlul erawh chu hmuhsit a ni ang.

⁹Mahni inngaihlu, chhang pawh nei si lo ai chuan, Tu ma ngaihsân loh, chhiahhlawh nei chu a ṭha zâwk.

¹⁰Mi fel chuan a ran nunna a engto va; Nimahsela, mi suaksual zahngaihna nêm ber pawh hi a râwng a ni.

¹¹A lei lettu chuan chhang a ngah ang a; Nimahsela, mi lêlo tih dân zâwmtu chu finna nei lo mi a ni.

¹²Mi suaksualte chuan mi ṭha lote lên an duh a, Mi felte bul erawh chuan rah a chhuah ṭhîn.

¹³Mi sual chu ama hmuia chhuak ngeiin a âwk ṭhîn a, Mi felte erawh chu buaina ata an chhuak ang.

¹⁴Miin a ṭawngkam chhuak rah chu a seng ang a, Ama kut thiltih ngei chu a hnênah hlan a ni ang.

¹⁵Mi a kawng chu ama mitah chuan a dik a, Mi fing erawh chuan rorêl a ngaichâng ṭhîn.

¹⁶Mi a buaina chu a lang nghâl a, Mi fing erawh chuan mualphona a thup ṭhîn.

¹⁷Thu dik sawi chuan felna a entîr a, Hretu dik lo erawh chuan bumna.

¹⁸Khandaih chhun anga na taka mi chhun thu sawi an awm a, Mi fing lei erawh chu damna a ni.

¹⁹Thutak hmui chu kumkhuain tihngheh a ni ang a, Lei dawthei erawh chu rei lo tê atân chauh a ni.

²⁰Thil ṭha lo suangtuahtute thinlungah chuan bumna a awm a, Remna rorêltute pawh chuan lâwmna an nei.

²¹Mi felte chungah chuan pawi khawihna a thleng lo vang a, Mi suaksualte erawh chu thil ṭha lovin an khat ang.

²²Hmui dawthei hi LALPA ten zâwng tak a ni a, Dik taka titute erawh chu a lâwm zâwng an ni.

²³Mi fing chuan finna a thup a, Mi â thinlung erawh chuan âtna a puang.

²⁴Mi taima kut chuan rorêlna a keng ang a, Mi thatchhia erawh chu hna rim tak thawk tûra tih a ni ang.

²⁵Lungkham neih hian mi a tihrehawm a, Thu ṭha erawh chuan mi a tilâwm ṭhîn.

²⁶Mi fel chu a ṭhenawm tân hruaitu a ni a, Mi suaksualte kawng erawh chuan bona a thlensak ṭhîn.

²⁷Mi thatchhia chuan ramvâka a kah rawh tûr a nei lo; Nimahsela, mihring sum hlu chu taihmâk a ni.

²⁸Felna kawngah chuan nunna a awm a, Chumi kawngah chuan thihna a awm lo.