Read Mizo_Old_version Thufingte 15 Bible Online

Thufingte 15 - Mizo_Old_version bible

Thufingte 15

¹Chhânna nêmin thinur a tikiang ṭhîn a, Ṭawng huatthlala erawh chuan thinur a chawk tho ṭhîn.

²Mi fing lei chuan finna thu dik a chhak chhuak ṭhîn a, Mi a ka erawh chuan thu âtthlâk a chhâk chhuak ṭhîn.

³ LALPA mit chu hmun tinah a awm a, Thil ṭha leh ṭha lo a enthla reng ṭhîn.

⁴Lei dik tak chu nunna thing a ni a, Luhlulna awmna erawh chu thinlung lungchhiatna a ni.

⁵Mi â chuan a pa thununna a ngainêp ṭhîn a, Zilhhauna ngaisâng chuan hmanghre takin a ti ṭhîn.

⁶Mi fel inah chuan sum tam tak a awm a, Mi suaksual hlâwkna erawh chu buaina a ni.

⁷Mi fing hmui chuan hriatna a tidarh a, Mi a thinlung erawh chuan chutiang chu a ti lo.

⁸Mi suaksual inthawina chu LALPA tâna tenawm a ni a, Mi ṭha ṭawngṭaina erawh chu a lâwm zâwng a ni.

⁹Mi suaksual kawng chu LALPA tâna tenawm a ni a, Felna kawng zawhtu erawh chu a hmangaih ṭhîn.

¹⁰Kawng pênsantu thununna chu a na a, Zilhhauna hawtu chu a boral ang.

¹¹Seol leh Abaddon chu LALPAN a hmu tlang a, Mihring thinlung phei chu a va hmu chiang dâwn êm!

¹²Hmuhsit chîng mi chuan zilhhauva awm a ngaina lo va, Mi fing hnênah chuan a kal duh lo vang.

¹³Thinlung hlimin hmêl hlim a siam a, Thinlung lungngaihna erawh chuan rilru a tilungchhe ṭhîn.

¹⁴Hriat thiamna thinlung neitu chuan hriatna a zawng a, Mi a ka erawh chu dâwtin a inhrai ṭhîn.

¹⁵Hrehawm tuartu tân chuan ni zawng zawng hi a ṭha lo vek a, Thinlung hlim mi erawh chuan ruai a ṭheh reng mai a ni.

¹⁶ LALPA hlauhna nêna tlêm tê neih chu, Tam tak neiha buaina tawh ai chuan a ṭha zâwk.

¹⁷Hmangaihna awmnaa anhnah chawa rin chu, Huatna awmnaa bâwngpa châwm thau ei aiin a ṭha zâwk.

¹⁸Mi thinchhia chuan inhauna a chawk tho va, Mi thluak nêm erawh chuan inhauna a tireh.

¹⁹Mi thatchhe kawng chu hlîng pal ang a ni a, Mi tluang kawng chu lamliana siam a ni.

²⁰Fapa fing chuan pa hlim a siam a, Mi â erawh chuan a nu a ngainêp ṭhîn.

²¹Finna nei lote chuan âtna hi an hlimna a ni a. Thil hre thiam mi erawh chuan a kawng a tingîl ṭhîn.

²²Remruat lâwk lova thiltih chu a kal sual ṭhîn a, Remhria an tam erawh chuan a hlawhtling ṭhîn.

²³A hun taka chhânna dik hriat hi A va lâwmawm êm!

²⁴Mi fing tân chuan nunna kawng hi a chung lamah a kal a, Hnuai lama Seol chu a kalsan theih nân.

²⁵ LALPAN mi chapo in chu a kar phawng ang a, Hmeithai hmun erawh chu a tinghet ang.

²⁶Remruatna ṭha lo chu LALPA tân thil tenawm a ni a, Mi thianghlim thu erawh chu a benglût a ni.

²⁷Mi duhâm chuan ama chhûngkua a tibuai ṭhîn a, Tham hawtu erawh chu a hmuingîl ang.

²⁸Mi fel thinlung chuan ngun takin a chhâng a, Mi suaksual ka erawh chuan thil ṭha lo a chhâk chhuak ṭhîn.

²⁹ LALPA chu mi suaksual lakah chuan a hla a, Mi fel ṭawngṭai erawh chu a ngaithla ṭhîn.

³⁰Hlim hmêlin mi a tilâwm a, Chanchin lâwmawmin mi a tiharh.

³¹Nunna zilhhauna pawm ṭhîn chu Mi fing zîngah a tel ang.

³²Thununna duh lo chuan a thlarau a ngainêp a, Zilhhauna pawm erawh chuan hriat thiamna a chang ang.

³³ LALPA ṭihna chu finna zirtîrtu a ni a, Inngaihtlâwmna chu chawimawia awmna a ni.