Read Mizo_Old_version Thufingte 16 Bible Online

Thufingte 16 - Mizo_Old_version bible

Thufingte 16

¹Rilru lo ruahman lâwkna chu mihring chan a ni a, Lei chhânna erawh chu LALPA aṭangin a ni.

²Mi ama ngaihin a kawng zawng zawng a thianghlim a; Nimahsela, LALPAN rilrute a bûk ṭhîn.

³I hnate chu LALPA kawltîr rawh; Tichuan, i thil ruahmante chu tihnghehin a awm ang.

⁴ LALPAN thil zawng zawng hi chhan nei ṭheuhvin a siam a, A ni tak e, mi suaksualte pawh hi ni ṭha lo atân.

⁵Thinlunga chapo apiangte chu LALPA tâna tenawm an ni; Inthurual mah se, hrem lohvin chhuah an ni lo vang.

⁶Zahngaihna leh thutakin khawlohna chu tlen fai a ni a, LALPA ṭihnain miin sual a kalsan ṭhîn.

⁷Mi, a awm dânin LALPA a tihlâwm chuan, A hmêlma nên lam inremin a awmtîr ṭhîn.

⁸Fel lo taka deh chhuah tam tak ai chuan, Fel taka deh chhuah tlêm tê a ṭha zâwk.

⁹Mihring rilruin a kawng a ruahman a, A ke pên erawh chu LALPAN a hruai ṭhîn.

¹⁰Lal kaah chuan Pathian thu tihtlûk a awm a; A kâ chuan a rêl sual lo vang.

¹¹Bûkna leh tehna dik hi LALPA ta a ni a, Ip rih zâwngte chu a ngaihtuah ṭhîn.

¹²Suahsualna thil tih hi lalte tân tenawm a ni, Lalṭhutthlêng chu felnaa tihngheh a ni si a.

¹³Kâ fel chu lal lâwmna a ni a, Thu dik sawi chu a ngaina ṭhîn.

¹⁴Lal thinurna chu thihna zualko ang a ni a, Mi fing erawh chuan a nem dai ang.

¹⁵Lal hmêl êngah chuan nunna a awm a, A duhsakna chu ruahtui tla hnuhnûng chhûm ang a ni.

¹⁶Rangkachak ai chuan finna neih hi a va ṭha nasa zâwk êm! A ni, tangkarua ai chuan hriat thiamna chu thlan zâwk tûr a ni.

¹⁷Mi tluangte lamlian chu sual kalsan a ni; A kawng vêng ṭha chuan a nunna a humhim a ni.

¹⁸Chapona chu boralna hmaah a kal a, Rilru intivei chu tlûkna hmaah.

¹⁹Mi chapote nêna râllâk thil insem ai chuan, Mi retheite nêna rilru thuhnuairawlh nih a ṭha zâwk.

²⁰Thu chîk taka dâwn mi chuan thil ṭha a dawng ang a, LALPA ring apiang chu an nihlawh ang.

²¹Rilrua fing chu mi remhria tih an ni ang a, Ṭawngkam thlumna chuan thiamna a tipung.

²²Hriat thiamna hi a neitu tân chuan nunna tuikhur a ni a, Mi âte tân erawh chuan thununna chu an âtna a ni.

²³Mi fing thinlung chuan a ka a zirtîr ṭhîn a, A hmuiah thiamna a belhchhah ṭhîn.

²⁴Thu pai nuam chu khawithlâr ang a ni a, Nunna tân a thlum a, ruh tân hrisêlna a ni.

²⁵Mi ngaiha kawng dik ni âwm taka lang, A tâwp chu thihna kawng ni si a awm.

²⁶Hnathawk mi chu ei tûr avângin a rim a, A rilṭâm reh nân a thawk rim ṭhîn.

²⁷Mi tlâktlai lo chuan pawi khawih tûr a ngaihtuah chhuak a, A kaah mei sa tak a awm.

²⁸Ṭawng chaltlai mi chuan inhauna a theh darh a, Sêsêa thu sawi hmangin ṭhian bulte a tiṭhen ṭhîn.

²⁹Mi nunrâwngin ṭhenawmte a hruai sual ṭhîn a, Kawng ṭha lovah a hruai ṭhîn.

³⁰A mit maimitchhîng chuan thil ṭha lo suangtuah nân a ti a ni a, A heh pettu chuan thil ṭha lo a thlen ṭhîn.

³¹Lu ṭuak chu ropuina lallukhum a ni a, Felna kawngah hmuh a ni ang.

³²Mi thinnel chu mi chak aiin a ṭha zâwk a, A rilru thunun hneh chu khaw latu aiin.

³³Mal chungah ṭhum an vâwr a, Thil lo chhuak erawh chu LALPA tih a ni.