Read Mizo_Old_version Thufingte 17 Bible Online

Thufingte 17 - Mizo_Old_version bible

Thufingte 17

¹Insual bur bura ruaiṭhehna in ai chuan, Inrem taka chaw ṭhing bâr khat eina a ṭha zâwk.

²Chhiahhlawh fing taka che chuan fapa, mualphona thlentu chungah chuan ro a rêl ang a, Unau ro zîngah chanvo a nei ang.

³Tihthianghlimna bêl chu tangkaraw tân a ni a, rawh tuina chu rangkachak tân a ni a, Thinlung erawh chu LALPAN a fiah ṭhîn.

⁴Thil ṭha lo titu chuan mi suaksual kamchâng a bengkhawn ṭhîn a, Mi dawthei chuan pawi khawih hmang lei lamah beng a chhi ṭhîn.

⁵Mi rethei hmusittu chuan a Siamtu a ngainêp a ni a, Mi vânduaina diriamtu chu hrem lohvin a awm lo vang.

⁶Tu leh fate hi upate lallukhum an ni a, Fanaute ropuina chu an pate hi an ni.

⁷Thusawi ropui leh mi â a inmawi lo va, Hmui dawthei leh lal fa a inmawi lo lehzual.

⁸A dawngtu mitah chuan thilpêk chu lunghlu ang a ni a, A hawina lam apiangah a hlawhtling ṭhîn.

⁹Bawhchhiatna thuptu chuan inhmangaihna a zawng a, Thil sawi sawi hmang chuan ṭhian bulte a tiṭhen ṭhîn.

¹⁰Mi â vawi za vuak aiin Mi fingah chuan vawi khat zilhhauna pawh a lût thûk zâwk.

¹¹Mi ṭha lo chuan helna ngawt a zawng ṭhîn a; Chuvângin, a chungah zualko nun chhia tirh a ni ang.

¹²Mi â ât lai tawh ai chuan Savawm, a no lâksak daih hmachhawn a duhawm zâwk.

¹³Ṭhatna suala thungrûltu chu Thil ṭha lovin a in a chhuahsan lo vang.

¹⁴Inhnial hi tuikhuah hnâm tîr ang a ni a; Chuvângin, insualna a awm ṭan hmain inhnial bâng rawh.

¹⁵Mi suaksual thiamtu leh mi fel thiam lotu chu, LALPA tân angkhat rengin an tenawm ve ve.

¹⁶Hriat thiamna nei si lo mi â kutah chuan, Engah nge finna leina tûr man a awm ni?

¹⁷Ṭhian chuan eng lai pawhin a hmangaih reng a, Mangan ni atân unauva piang a ni.

¹⁸Hriatna nei lo mi chuan a kut a bêng a, A ṭhenawmte hmaah mawhphurtuah a insiam ṭhîn.

¹⁹Insual ngaina mi chuan bawhchhiatna a ngaina ṭhîn a, A in hungna kawngkhâr tisâng chuan boralna a zawng ṭhîn.

²⁰Rilru luhlul nei mi chuan thil ṭha a hmu ṭhîn lo va, Tin, lei bengtlalo neitu chu pawi khawihnaah a lût ṭhîn.

²¹Mi â hringtu chuan ama lungngaihna a thlen ṭhîn a, Mi â pa chuan lâwmna a nei lo.

²²Thinlung hlim hi damdawi ṭha tak a ni a, Thinlung lungchhia erawh chuan ruh a tiro ṭhîn.

²³Mi suaksual chuan rorêlna kawngte tikikawi tûrin, Mi kut ata thamna a la ṭhîn.

²⁴Finna chu hriat thiamna neitu hmaah a awm ṭhîn a, Mi â mit erawh chu kâwlkilah a awm ṭhîn.

²⁵Fapa â chu a pa tilungngaitu a ni a, A hringtunu tân a khâ a ni.

²⁶Mi fel hrem a ṭha lo va, Mi ṭha an ṭhatna avânga vuak a ṭha hek lo.

²⁷A thusawia insûm ṭhîn chuan finna a nei a, Rilru dam mi chuan hriat thiamna a nei.

²⁸Mi â pawh a ngawih reng chuan mi finga chhiar a ni a, A hmui a chîp chuan mi remhriaa ngaih a ni.