Read Mizo_Old_version Thufingte 18 Bible Online

Thufingte 18 - Mizo_Old_version bible

Thufingte 18

¹Inkulh hrang mi chuan mahni duh zâwng a zawng ṭhîn a, Finna dik zawng zawng a tai ṭhîn.

²Mi â chuan hriatnaah lâwmna a nei lo, Ama rilruin a tihlan chauh lo chu.

³Suahsualna a lo awmin hmuhsitna pawh a lo awm ṭhîn, Mualphona a lo awmin zilhhauna.

⁴Mi â kâa thu chu tui thûk tak ang, Finna lui, lui luang ang a ni.

⁵Mi suaksual duhsak a ṭha lo va, Rorêlnaa mi fel hnâwl a ṭha hek lo.

⁶Mi â hmui chuan inhauna a thlen a, A kâ chuan vuakna a ko.

⁷Mi â kâ chu a boralna a ni a, A hmui chu a nunna thang a ni.

⁸Sêsêa thu sawi hmang mi thu chu chaw tui tak ang a ni a, Pum chhûngril berah a lût ṭhîn.

⁹A hnathawha mi dâwngdah pawh Tiboraltua unaupa a ni.

¹⁰ LALPA hming chu kulhpui a ni a, Mi fel chu a tlân lût ṭhîn a, a him ṭhîn.

¹¹Mi hausa chuan a sum chu a kulhpui a ni a, A suangtuah dânah chuan kulh sâng tak a ni.

¹²Mihring rilru chapona chu boralna hmaah a kal a, Inngaihtlâwmna chu chawimawina hmaah.

¹³Ngaihthlâk ahmaa chhân chu A tân âtthlâk nihna leh mualphona a ni.

¹⁴Mi rilru nei chuan a chak lohna chu a tuar zo vang a; Mahse, rilru hliam chu tun nge tuar thei ang?

¹⁵Remhre thinlung chuan hriatna a dawng ṭhîn a, Mi fing beng chuan hriatna a zawng ṭhîn.

¹⁶Mi a thilpêkin kawng a tihkuaksak a, Mi ropuite hmaah a hruai lût ṭhîn.

¹⁷A thiamna thu sawi hmasatu chu felin a lang ṭhîn a; Mahse, a ṭhenawmte an lo kal a, an rawn tilang ṭhîn.

¹⁸Ṭhumvâwrin inhauna a tibâng a, Mi chakte a tiṭhen ṭhîn.

¹⁹I unau pui la, kulhpui angin a hum ang che; In inhau erawh chuan, a inkhâr hnan ang che.

²⁰Miin a pumpui chu a kâ rahin a tikhat ang a, A kâa thil hâwngin a titlai ang.

²¹Lei thiltihtheihnaah chuan thihna leh nunna a awm a, A ngainatute chuan chumia rah chu an ei ang.

²²Nupui hmu chuan thil ṭha a hmu a ni, LALPA duhsakna a chang ṭhîn.

²³Mi rethei chuan a thlêmin an thlêm a, Mi hausa erawh chu rura takin an ṭawng ṭhîn.

²⁴Ṭhian tam tak siam chuan mahni intihchhiatna a siam a ni a; Amaherawhchu, unau aia nghet zâwk ṭhian an awm ṭhîn.