Read Mizo_Old_version Thufingte 19 Bible Online

Thufingte 19 - Mizo_Old_version bible

Thufingte 19

¹Mi, a hmuia tihmawh, â bawk si ai chuan Mi rethei, rilru ṭha tak pua awm chu a ṭha zâwk.

²Hriatna lova duhna ngawt pawh hi a ṭha lo va, Ke chhep rang ringawt chu a kal sual ṭhîn.

³Mi a âtnain a kawng a tihchhiatsak ṭhîn a, A rilru LALPA chungah a vui ṭhîn.

⁴Sumin ṭhian tam tak a neih belhtîr a, Mi rethei erawh chu a ṭhianten an thlauhthla ang.

⁵Hretu der chu hrem lohvin a awm lo vang a, Dâwt sawi chu a chhuak lo vang.

⁶Mi tam takin mi thilphal duhsakna an ngên ang a; Thil pe ṭhîntu lakah chuan mi tin mai hi ṭhian an ni.

⁷Mi rethei chu a unaute zawng zawng chuan an vai huat ṭhîn a, Ṭhian maite chu a lakah an va hla lehzual dâwn êm! Thuin a ûm a; nimahsela, an kal daih tawh.

⁸Finna dawngtu chuan ama nunna a hmangaih ṭhîn a, Hriatna vawngtu chuan thil ṭha a hmu ang.

⁹Hretu der chu hrem lohvin a awm lo vang a, Dâwt sawi chu a boral ang.

¹⁰Nunkhaw nawm chu mi â nên a inhmeh lo va, Chhiahhlawhin lal fate chunga rorêl chu a inhmeh lo lehzual.

¹¹A ngaihruat thiamnain mi a thin a tihnelsak ṭhîn a, Bawhchhiatna hai der chu a ropuina a ni.

¹²Lal thinrim chu sakeibaknei rûm ang a ni a, A duhsakna erawh chu hlobet chunga dai ang a ni.

¹³Fapa â chu a pa vânduaina a ni a, Nupui ân ṭhinna chu eng lai pawha ruah far reng ang a ni.

¹⁴In leh sum leh pai chu pate laka ro luah a ni a, Nupui remhria erawh chu LALPA laka mi a ni.

¹⁵Dâwngdahna chuan tui taka mutnaah a hruai lût a, Mi thatchhia chuan rilṭâm a tuar ang.

¹⁶Thupêk vawng ṭha chuan a nunna a vawng ṭha a ni a, A awm dâna fîmkhur lo erawh chu a thi ang.

¹⁷Mi rethei khawngaih chuan LALPA a pûktîr a ni a, A thil tihṭhat chu a rûl ang.

¹⁸Beiseiawm a la nih laiin i fapa chu thunun la, Boral mai tûrah ngai suh.

¹⁹Thinur ti nasa mi chuan hrem a tuar ang, I chhanchhuah pawhin, chhanchhuah leh ṭhin a ngai ang.

²⁰A tâwp a tâwpa i lo fin theih nân zilhna pawm la, Thununna pawisa rawh.

²¹Mihring thinlungah suangtuahna tam tak a awm a; LALPA remruat erawh chu a pângngai reng ang.

²²Mi a duhthusâm chu a ngilneih dân tehna a ni a, Mi dawthei ai chuan mi rethei a duhawm zâwk.

²³ LALPA ṭihna chuan nunna a thlen a, A nei apiang chu lungawi takin an awm ang a, Thil ṭha lovin a tlâkbuak lo vang.

²⁴Mi thatchhia chuan a kut thlêngah a hnim a, A kâ han thlen leh takngial pawh a peih lo.

²⁵Hmuhsit chîng mi chu vua la; Tichuan, mi mâwlin remhriat a zir ang a; Ngaihthiamna nei chu zilh la, a hre thiam ang.

²⁶Pate tiretheia, nute hnawt chhuak chu, Fapa, mualphona thlena, hmingchhiatna thlentu a ni.

²⁷Ka fapa, thil tidik lo tûra Finna zirtîrna thu ngaihthlâk chu bâng rawh.

²⁸Thuhretu tlâktlai lo chuan rorêlna a hmusit a ni a, Mi suaksual kâ chuan khawlohna a lem.

²⁹Rorêlna chu hmuhsit chîngte tâna buatsaih a ni a, Vuakna chu mi âte hnungzâng atân.