Read Mizo_Old_version Thufingte 20 Bible Online

Thufingte 20 - Mizo_Old_version bible

Thufingte 20

¹Uain hi nuihzatbûra mi siamtu a ni a, Zupui hi insual bûng bûngna a ni; Chumi buma awmte chu an fing lo a ni.

²Lal vauna chu sakeibaknei rûm ang a ni a, Tu pawh a thin tiur chu mahni nunna chunga thil tisual an ni ṭhîn.

³Intihbuaina ata lo inthiarfihlîm hi thil duhawm a ni a, Mi â apiangte chu an insual ṭhîn.

⁴Mi dâwngdah chuan thlasik avângin lei a let peih lo va; Chu vâng chuan buh seng laiin kut a dawh ang a, Eng mah a nei lo vang.

⁵Remruatna chu mihring thinlungah tui thûk tak ang a ni a; Nimahsela, hriat thiamna nei chuan a phawrh chhuak ang.

⁶Rinawm tak niin an insawi ṭheuh va, Rinawm tak tak tu nge hmu thei ang?

⁷Mi fel, ama remruat thiama awm mi fate chu an nihlawh e.

⁸Rorêlnaa lal ṭhu chuan, A mitin thil ṭha lo zawng zawng a tibo ṭhîn.

⁹“Ka thinlung ka tithianghlim a, Ka sual lakah ka thianghlim,” tu nge ti thei?

¹⁰Bûkna dang dang te, tehna dang dang te hi, LALPA mit hmuhah angkhat rengin thil tenawm a ni ve ve.

¹¹Naupang takngial pawh a thiltihin a intilang ṭhîn, A thiltih chu a thianghlim leh a dik emawin.

¹²Hriatna beng leh hmuhna mit hi LALPA siam ve ve a ni.

¹³Mut thlahlel suh, i lo pachhe dah ang e; I mit meng la; tichuan, chhang kham khawp i nei dâwn nia.

¹⁴“Eng mah a nih loh hi, eng mah a nih loh hi,” thil leitu chuan a ti ṭhîn a, A kal hnu chuan a chhuang leh viau si ṭhîn.

¹⁵Rangkachak te a awm a, lunghlu sen te pawh a tam a; Hriatna hmui erawh chu lungmawi hlu tak a ni.

¹⁶Hnam dang tâna mawhphurtua inpe silhfên chu la la, Hnam dang tâna inpe chu hrêngah hmang rawh.

¹⁷Bumna chhang chu miin tui a ti a; Mahse, a hnuah a ka chu lungtêin a khat ang.

¹⁸Mi râwnin i thiltum chu bûk la, Fel taka rêlin hmêlma bei rawh.

¹⁹Mi kamtam tei vêl ruai chuan thurûkte a tilang ṭhîn a; Chuvângin, a kâ zau taka âng chu pâwl suh.

²⁰A nu emaw, a pa emaw ânchhe lawhtu chu, Thimtham lai berah a khâwnvâr tihmihsak a ni ang.

²¹Sum hi a tîrah deh chhuah thuai theih mah sela, A tâwpah malsâwm a ni kher lo vang.

²²“Sual chu ka thungrûl teh mai ang,” ti suh la, LALPA ngaichâng rih la, ani chuan a chhanhim ang che.

²³Bûkna dang dang hi LALPA mit hmuhah thil tenawm a ni a, Khîn dik lo hi a ṭha lo a ni.

²⁴Mihring kawngte chu LALPA ruat a ni a, Engtin nge mihringin a kawng an hriat theih ang?

²⁵Pathian tân thil pe tûrin intiam thut suh, I inchhîr leh dah ang e.

²⁶Lal fing chuan mi suaksualte a zâp kiang a, An chungah sisêp a ruai ṭhîn.

²⁷Mihring rilru chu LALPA khâwnvâr a ni a, Pumpui chhûngril lam zawng zawng pawh a ên chhuak ṭhîn.

²⁸Zangaihna leh thutakin lal a vawng ṭha a, A ṭhutthlêng chu zahngaihnaa tundinin a awm.

²⁹Tlangvâlte ropuina chu an chakna a ni a, Putarte mawina chu an lu ṭuak a ni.

³⁰Pem khawpa vuakna chuan thil ṭha lo a tlêng fai a, Vuakna chuan pumpui chhûngril lamte pawh a fan.