Read Mizo_Old_version Thufingte 21 Bible Online

Thufingte 21 - Mizo_Old_version bible

Thufingte 21

¹Lal thinlung chu LALPA kutah a awm a, tui luanna kawng angin, A duh duhnaah a tikawi ṭhîn.

²Mi tin awm dân hi mahni mitah chuan a dik tih a ni a; Nimahsela, LALPAN thinlung a bûk ṭhîn.

³Inthawina aiin dik tak leh fel taka rorêl chu LALPA tân a pawmawm zâwk.

⁴Mi indah chung leh rilru chapo te, Mi suaksual khâwnvâr te hi sual a ni.

⁵Mi taima ngaihtuahna chuan neihnunna lam chauh a pan a, Mi thatchhia erawh chuan tlâkchhamna lam chauh a pan a ni.

⁶Lei dawthei hmanga sum deh chhuah chu, Chhûm thli chhêm lên chhêm lên ang a ni; A zawngtu chu thihna zawng a ni.

⁷Mi suaksualte nunrâwnna chuan anmahni a hnâwl bo vang, Rorêlna fel an duh loh avângin.

⁸Thiam lohna phurtu kawng chu a kawi êm êm mai a, Mi thianghlim erawh chu a thiltih a ngîl a ni.

⁹Hmeichhe inhau hmang tak nêna in zau taka awm ai chuan, In chung chhîp kila awm a ṭha zâwk.

¹⁰Mi suaksual rilru chuan thil ṭha lo a duh a, A ṭhenawmten a mitah duhsakna an hmu lo.

¹¹Hmuhsit chîng mite hrema an awmin mi mâwlte chuan an fin phah a; Tin, mi fing chu zirtîra a awmin hriatna a dawng ṭhîn.

¹²Mi fel chuan mi suaksual chhûngkuate a ngaihtuah ṭhîn a, Mi suaksualte an chhiatna tûra thehthang bo an nihzia te.

¹³Mi rethei au thâwma beng chhu ngawng chu, Ani pawh a au vang a; nimahsela, ngaihthlâksak a ni bîk lo vang.

¹⁴A rûka thilpêkin thinur a tireh a, Âng chunga thilpêkin thinrim nasa tak.

¹⁵Rorêl fel hi mi fel lâwmna a ni a, Khawlohna titu tân erawh chuan boralna a ni.

¹⁶Hriatna kawng ata kal bo chu Mitthi awm khâwm zîngah a châwl ang.

¹⁷Nawmsakna thlahlel chu mi rethei a ni ang a, Uain leh hriak ngaina mi chu a hausa lo vang.

¹⁸Mi suaksual chu mi fel tlanna an ni ang a, Mi bum hmang chu mi dik tak tlanna.

¹⁹Hmeichhe ân hmang leh phunchiar nêna awm ai chuan Thlalêr rama awm a ṭha zâwk.

²⁰Mi fing awmnaah chuan ro leh hriak hlu tak a awm a, Mi â erawh chuan an dawlh mai ṭhîn.

²¹Felna leh zahngaihna zuitute chuan Nunna te, felna te, chawimawina te an hmu ang.

²²Mi fing chu mi chak khawpuiah a lâwn a, Chumia an rin pui ber chakna chu a lâk thlâksak ṭhîn.

²³Tu pawh a kâ leh a lei vêng ṭha chuan Manganna lakah a nunna a vêng ṭha a ni.

²⁴Mi chapo leh mi intivei chu a hming pawh Hmusittua a ni; Inngaih ropui chaponain thil a ti ṭhîn.

²⁵Mi dâwngdah duhthusâm chuan amah a tihlum ṭhîn, A kutin hnathawh a duh loh avângin.

²⁶Nilênga duhâm taka awh nei an awm a; Mi fel erawh chuan a pe a, eng mah a sûm lo.

²⁷Mi suaksual inthawina chu thil tenawm a ni a, Rilru sual nêna a rawn lâk chu a va tenawm lehzual dâwn êm!

²⁸Hretu der chu a boral ang a; Nimahsela, hretu dik chuan tu ma dodâl lohvin thu a sawi ang.

²⁹Mi suaksualin a hmêl a tiruh a, Mi fel erawh chuan a kawng a rêl fel ṭhîn.

³⁰ LALPA kalh zâwnga hlawhtling finna te, hriatna te, Remruatna te a awm lo.

³¹Sakawr chu indo ni atân buatsaih a ni a, Hnehna erawh chu LALPA ta a ni.