Read Mizo_Old_version Thufingte 22 Bible Online

Thufingte 22 - Mizo_Old_version bible

Thufingte 22

¹Sum tam tak aiin hmingṭhat hi thlan zâwk tûr a ni a, Tangka leh rangkachak aiin duhsakna a ngainatawm.

²Mi hausa leh mi rethei an awm za a, An vaia siamtu chu LALPA a ni.

³Mi hmanghria chuan thil ṭha lo chu a hmuhin a biru ṭhîn a; Mi mâwl erawh chuan a tâwn mai ṭhîn a, a tuar phah ṭhîn.

⁴Inngaihtlâwmna leh LALPA ṭih man chu Sum te, chawimawina te, nunna te a ni.

⁵Mi bengtla lo kawngah chuan hlîng te, thang te a awm a, A nunna vawng ṭha chuan a hlat daih ang.

⁶Naupang chu a kalna âwm kawngah chuan zirtîr ula, A upat hun pawhin a thlah lo vang.

⁷Mi hausain mi rethei ro an rêlsak a; Tin, pûktu chu a pûktîrtu chhiahhlawh a ni.

⁸Khawlohna tuhtu chuan vânduaina a ât ang a, A thinurna talhtum chu a hlawhchham ang.

⁹Mi thilphal chu malsâwmin a awm ang, A chhang mi rethei a pêk ṭhin avângin.

¹⁰Hmuhsit chîng mi chu paih chhuak ula, inhnialna chu a kiang ang, A ni, insualna te, inrunluihna te a reh ang.

¹¹Thinlung thianghlimna ngaina chuan A ṭawngkam chhuak mawi avângin lal chu a ṭhian a ni ang.

¹² LALPA mit chuan hriatna nei mi chu a vawng ṭha ṭhîn a, Mi vervêk thu erawh chu a paihthlâksak ṭhîn.

¹³Mi thatchhia chuan, “Pâwnah sakeibaknei a awm a, Kawtthlêrah ka tualthi ang,” a ti.

¹⁴Hmeichhe sual kâ chu khuarkhurum thûk tak a ni a, LALPA huat zâwngte chu chutah chuan an tla ang.

¹⁵Naupang thinlungah chuan âtna a bet tlat a; Mahse, thununna tiangin hla takah a hnawt kiang ang.

¹⁶A hlâwkna tûra mi rethei hnehchhiah leh, Mi hausa tlawntu chuan tlâkranna mai a thlen ang.

¹⁷I beng chhi la, mi fing thu ngaithla rawh; Tin, i thinlung chu ka finna dawn nân hmang rawh.

¹⁸I thinlung chhûnga i vawna, I kâa i tihngheh bawk chuan thil duhawm tak a ni.

¹⁹I rinna chu LALPA chunga a awm theih nân, Vawiinah hian i hnên ngeiah ka hriattîr che a ni.

²⁰Thutak nghehzia hriattîr che leh, A rawn petu che hnêna thutak chu i lêtpui theih nân, Remruat dân leh hriatna ṭha tak ka ziaksak che a ni lâwm ni?

²²Mi rethei chu rawk suh, a rethei si a, Kulh kawngkaah mi lungngaite hnehchhiah hek suh;

²³ LALPAN an thu a sawipui dâwn si a, Anmahni rawktute nunna chu a rawk dâwn a ni.

²⁴Thinrim hmang mi chu ṭhian suh la, Mi thinchhia chu kawp suh;

²⁵A tih dân i zir ang a, I nunna atân thang i tawng dah ang e.

²⁶Intiamkamte zîngah tel suh la, Leiba atân intiamkamtute zîngah pawh.

²⁷Eng mah pêk tûr i neih si loh chuan Engah nge i khum chu a lâksak loh vang che?

²⁸In pi leh puten hmakhawsânga Ramri an lo kham chu sawn suh u.

²⁹Mi a hnathawha taima i hmu ṭhîn em? Lal hmaah te a awm ang a, Mi narân hmaah chuan a awm lo vang.