Read Mizo_Old_version Thufingte 23 Bible Online

Thufingte 23 - Mizo_Old_version bible

Thufingte 23

¹Rorêltute nêna chaw eia in ṭhut dunin I hmaa mi chu ngun takin en rawh.

²I ril a ṭâm hle chuan Insûm deuh vang che.

³Bumna chaw mai a nih hre reng la, A tuina ngawt chu ît suh.

⁴Intihausa tûrin intihah suh la, Nangma finna rin bâng rawh.

⁵Thil awm lo chungah i mit i nghat dâwn em ni? Sum chuan thla a insiam ngei ngei a, Mupui vân lama thlâwk ṭhîn ang hian.

⁶Mi fîr chhang chu ei suh la, A thil tuihnaite ît hek suh.

⁷A suangtuah ang chiah zêlin a ni a awm ni, “Ei rawh, in rawh,” a ti ang chia; Mahse, a rilru chuan ngaimawhna che a nei lo.

⁸I chaw bâr chu i luak chhuak ang a, I thu thlum tak chu i chân ang.

⁹Mi â beng hriatah chuan thu sawi suh, I thufingte chu a ngainêp dâwn si a.

¹⁰Hmakhawsânga ramri lo kham chu sawn suh la, Pa nei lote lovah inrawlh suh.

¹¹Anmahni tlantu chu a chak a, I chungah an thu a sawipui dawn si a.

¹²Zirtîrna lamah i rilru nghat la, I beng chu hriatna thu lamah.

¹³Naupang thunun tîm suh, Tiangin vaw mah la, a thi dâwn si lo va.

¹⁴Tiangin i vua ang a; Tichuan, Seol ata a nunna i chhanchhuak ang.

¹⁵Ka fapa, i rilru a fin chuan Ka thinlung a lawm tak tak ang.

¹⁶A ni, i kain thil dik a sawiin Ka rilru a hlim ang.

¹⁷I thinlungin mi sual awt suh se; Nilêngin LALPA ṭihin awm zâwk rawh.

¹⁸Lâwmman a awm ngei dâwn si a, I beisei chu tihbovin a awm lo vang.

¹⁹Ka fapa, ngaithla la, fing la, Kawngah chuan i thinlung hruai rawh.

²⁰Uain heh mite zîngah leh Sa heh mite zîngah tel suh;

²¹Zu rui mite leh sa heh mite chu an lo rethei dâwn si a, Nguinain puan chhia a sintîr ang.

²²I pa, a hringtu che thu chu pawm la, I nu chu a lo tarin hmusit suh.

²³Thu dik chu lei la, hralh leh tawh suh; A ni, finna te, zirtîrna te, hriat thiamna te nên.

²⁴Mi fel pa chu nasa takin a hlim ang a, Fa fing hringtu chuan a chungah lâwmna a nei ang.

²⁵I nu leh pa chu hlim takin awm sela, A hringtu che chu hlim takin awm rawh se.

²⁶Ka fapa, i thinlung mi pe la, Ka awm dânte hian i mit tlung rawh se.

²⁷Nawhchizuar chu khuarkhurum thûk tak a ni a, Hmeichhe sual chu khuarkhurum zîm a ni;

²⁸A ni, rûkru angin mi an châng a, Mihring zîngah vervêkna an tipung ṭhîn.

²⁹Tute nge chungpik ṭhîna, tute nge lungngai ṭhîna, tute nge inhau ṭhîn? Tute nge thubuai nei ṭhîna, tute nge a vâng awm lova hliam tuar ṭhîna, Tute nge mit sen rêm rûm ṭhîn le?

³⁰Zu hmuna awm reng ṭhînte, Zu chawhpawlh in ṭhînte an ni.

³¹Uain a sen kâk laiin en suh, Nova a zia a lan lai te, A luan thlâk zaih zaih lai tein;

³²A tâwpah chuan rûl angin a chu a, Rûl tûr ṭha mi angin mi a chu ṭhîn.

³³I mitin thil mak takte a hmu ang a, I thinlungin thu chaltlai takte a chhâk chhuak ang.

³⁴A ni, mi tuifinriat lai taka mu ang emaw, Lawng puanzârna chhîpa mu ang emaw i ni ang.

³⁵“Mi vua a, a na si lo, Mi vêl a, ka hre lo, Eng tikah nge ka lo harh ang aw? Ka in leh bawk ṭhîn ang,” i ti ang.