Read Mizo_Old_version Thufingte 24 Bible Online

Thufingte 24 - Mizo_Old_version bible

Thufingte 24

¹Mi sualte awt suh la, An zînga tel châk hek suh.

²An thinlungin hnehchhiahna an zir a, An hmuiin pawi khawih lam thu mawlh an sawi ṭhîn a ni.

³Finnain in chu sak a ni a, Hriat thiamnain tihngheh a ni.

⁴Tin, hriatna avângin pindan chu Sum hlu tak leh duhawm taka tihkhahin a awm.

⁵Chakna aiin finna a ṭha a, Âwmkhauh aiin hriat thiamna.

⁶Beih hmain ngun taka râl rêl a ṭha, Rem i hriat poh leh i chak zâwk ang.

⁷Mi â tân finna chu a sâng lutuk a, Kulh kawngkaah a ka a âng lo.

⁸Thil ṭha lo ti tûra remruat ṭhîn chu Miten pawi khawih hmang an ti ang.

⁹Mi â ngaihtuahna chu sual a ni a; Tin, mi hmuhsit chîng mi chu mihring tân tenawm an ni.

¹⁰Mangan nia i chauh mai chuan I chakna a beitham a ni.

¹¹Thi tûra hruaite chu chhanchhuak la, Thah mai tûrte chu chhanchhuak thuai rawh.

¹²“Ngai teh, hei chu ka hre lo,” i tih mai chuan, Thinlung bûktu chuan a ngaihtuah dâwn lâwm ni? I nunna vawngtu chuan a hre dâwn lâwm ni? Mi tin an thiltih ang zêlin a rûl dâwn lâwm ni?

¹³Ka fapa, khawizu in rawh, a ṭha si a, Khawithlâr i kâa tui tak chu.

¹⁴Tichuan, i nunna atân finna chu chutiang a ni tih i hria ang a; Tin, i hmuh chuan lâwmman a awm ang a, I beisei chu tihbo a ni lo vang.

¹⁵Aw, mi suaksualpa, mi felte awmna chu châng suh; A awmna chu tihchhiatsak suh.

¹⁶Mi fel chu vawi sarih tlu mah sela, A tho leh zêl ṭhîn; Mi suaksual erawh chu chhiatnain a tiboral ṭhîn.

¹⁷I hmêlma a tlûkin lâwm suh la, Tihtlâwma a awmin i rilru lâwm suh se;

¹⁸Chuti lo chuan, LALPAN a hmu ang a, a lâwm lo vang a, A laka a thinrim a lamlêt dah ang e.

¹⁹Thil ṭha lo titute avângin intilungngai duh suh la, Mi suaksual awt hek suh.

²⁰Mi sual tân chuan lâwmman a awm dâwn si lo va, Mi suaksual khâwnvâr chu tihmih a ni dâwn si a.

²¹Ka fapa, LALPA leh lal chu ṭih la, Rilru danglam pu mite chu pâwl suh;

²²An chhiatna a lo thleng thut ang a, An boral kumte chu tun nge hria?

²³Hêngte pawh hi mi fing thusawi a ni, Rorêlnaa mi zah zâwng neih hi a ṭha lo a ni.

²⁴Mi suaksual hnêna, “I fel e,” titu chu Mi tinin ânchhia an lawh ang a, Hnam tinin an hua ang.

²⁵A zilhhautute erawh chu an hlim ang a, An chungah malsâwmna ṭha tak a lo thleng ang.

²⁶Dik taka chhângtu chu Ṭhian ṭha a ni.

²⁷Pâwn lam thil buatsaih la, Lo lamah inpeih diam la, Chumi zawhah i in sa rawh.

²⁸A vâng awm lovin i ṭhenawmte chungchâng thu-ah hretu ni suh la, I kain bum bawk suh.

²⁹“Ka chunga a tih angin a chungah ka ti ang a, A thawh dân ang zêlin ka pe ang,” ti suh.

³⁰Mi thatchhe lovah ka kal a, Hriatna nei lo mi grêp huanah nên;

³¹Ngai teh, hlîngin a hnim phui chûk mai a, A chhûng zawng zawng chu ṭaiṭênin a phui chûk mai a, A hungna lungpalte chu a chim vek a.

³²Tichuan, ka en reng a, ngun takin ka ngaihtuah ta a, A mi zirtîr chu ka hmu a, ka pawm ta a.

³³I duh chuan mu hlek la, chhîng hlek rawh, Kut kuangkuahin châwl hlek teh;

³⁴I mut hlânin i rethei hman ang a, Tlâkchhamnain sipai angin a nang thut ang che.