Read Mizo_Old_version Thufingte 27 Bible Online

Thufingte 27 - Mizo_Old_version bible

Thufingte 27

¹A tûk lama thil lo awm tûr chhuang suh, Chumi ni chuan eng nge a rawn chhuahpui dâwn i hre si lo.

²Nangma kaa infak lovin mi dangin fak zâwk che sela; Nangma hmui ni lo, hmêlhriat loh mi hmuiin.

³Lung hi a rit hle a, ṭiauvaivut pawh hi a khîn hle a; Nimahsela, mi âin mi an tihbuaina chu, Chumi pahnih ai pawh chuan a rit zâwk.

⁴Thinurna chu a râwng a, thinrimna chu a so va; Mahse, îtsîkna chu tu nge tuar zo awm?

⁵Hmangaihna inthup ai chuan A langa zilhhauna a ṭha zâwk.

⁶Ṭhian min hliamna chu a tak a, Hmêlma min fawhna erawh chu a der a ni.

⁷Mi puar tân chuan khawithlâr pawh a tenawm a, Mi rilṭâm tân erawh chuan thil khâ zawng zawng pawh a tui a ni.

⁸Mi a hmun vah bosan chu, Sava a bu thlawh bosan ang a ni.

⁹Hriak leh rimtuiin rilru a tihlim ṭhîn angin, Thinlung taka ṭhian remruatpuina chuan a tihlim ṭhîn a ni.

¹⁰Nangma ṭhian ngei leh i pa ṭhian chu thlauhthla suh; I vânduai niin i unaupa inah kal suh; Lamhla taka unau aiin lamhnaia ṭhenawmte chu an ṭha zâwk.

¹¹Ka fapa, fing la, ka thinlung tilâwm rawh; Mi sawichhetute ka chhân theih nân.

¹²Mi fing chuan thil ṭha lo a hmu a, a biru ṭhîn a, Mi mâwl erawh chuan a tâwn ṭhîn a, a tuar phah ṭhîn.

¹³Hnam dang tân mawhphurtua inpe silhfên chu la la, Ram dang hmeichhe tâna mawhphurtua inpe chu hrêngah hmang rawh.

¹⁴Zîng taka thova, ring taka a ṭhian malsâwmtu chu, A tân ânchhiaa ngaih a ni ang.

¹⁵Khawchêng leh hmeichhe ân hmang chu, Angkhat an ni;

¹⁶Chutiang nu khap beh tum chu, Thli hup beh leh hriak hûm beh tum ang a ni.

¹⁷Thîrin thîr a tihriam a, Chutiang bawkin miin a mihringpui a tihriam.

¹⁸Tu pawh theipui kûng nei chuan a rah a ei ang a, Tu pawh a pu rawngbâwl chu chawimawi a ni ang.

¹⁹Tuia hmêl ngai ngai a lang angin, Mihring thinlung chu mihringah a lang.

²⁰Seol leh Abaddon-in tâwk tih lêm a nei lo angin, Mihring mitin tâwk tih rêng a nei lo.

²¹Tihthianghlimna bêl chu tangkaraw tân a ni a, rawh tuina mei chu rangkachak tân a ni a, Mihring chu a thil fak zâwngah fiah a ni.

²²Mi â chu buh nên sumah sukin dêng mah ula, A âtna chuan a thlah lo vang.

²³I berâm rualte awm dân chu hriat tumin taihmâk chhuah la, I ran rualte chu vêng ṭha rawh;

²⁴Sum leh paite chu chatuan atân a ni lo va; Lallukhum chuan chhuan zawng zawng a daih em ni?

²⁵Hlobet chu an ât a, hlobet no dep a lo lang a; Tlânga hlobet an la khâwm a.

²⁶Berâmte chu i silhfên atân a ni a, Kêlte chu lo man atân;

²⁷I khawpkham tûr kêlhnutê a awm ang a, In chhûngkuaa ei atân, in nulate châwmna te nên.