Read Mizo_Old_version Thufingte 28 Bible Online

Thufingte 28 - Mizo_Old_version bible

Thufingte 28

¹Mi suaksualte chu tu ma ûm lohvin an tlânchhia a, Mi felte erawh chu sakeibaknei angin an huai.

²Ramin a bawhchhiat chuan puipate an inthlâk zut ṭhîn a; Mi thil ngaih dân thiam leh hriatna neite erawh chu ram chuan a din rei phah ang.

³Pachhiate hnehchhiahtu mi rethei chu, Ei tûr eng mah hnutchhiah lova lên bo vektu ruah ang a ni.

⁴Dân hawisantute chuan mi suaksual an fak ṭhîn a, Dân zâwmtute erawh chuan an kalh ṭhîn.

⁵Mi ṭha lo chuan rorêl an hre thiam ṭhîn lo va; LALPA zawngtute erawh chuan engkim an hre thiam ṭhîn.

⁶Mi hausa awm dân dik lova awm ai chuan, Mi rethei awm dân dik taka awm chu a ṭha zâwk.

⁷Tu pawh dân zâwmtu chu fapa fing a ni a, Mi virte ṭhian erawh chuan a pa mualphona a thlen ṭhîn.

⁸A pung ûma a sum tipungtu chuan, Mi rethei lainattu tân a khâwlsak a ni.

⁹Dân ngaithla duh lova hnuchhawntu chu, A ṭawngṭaina pawh tenawm a ni.

¹⁰Mi ṭha kawng ṭha lova kal botîrtu chu Ama hum laihah ngei a tla ang a, Mi ṭha famkimte erawh chuan thil ṭha an rochung ang.

¹¹Mi hausa chu ama ngaihin a fing a; Nimahsela, mi rethei thil ngaih dân thiamte chuan an lailang ang.

¹²Mi fel hlawhtlinnaah chuan ropuina nasa tak a awm a; Mi sual an dinchan erawh chuan mite an biru ṭhîn.

¹³Bawhchhiatna zêptute chu an hmuingîl lo vang a, Zêp lova inpuanga hawisantute chuan zahngaihna an hmu ang.

¹⁴ LALPA ṭih mi chu a eng a thâwl a, Thinlung tikhauhtu erawh chu vânduainaah a tlu lût ang.

¹⁵Mi rethei chunga rorêltu suaksual chu, Sakeibaknei rûm ang leh savawm pâwng vâk ruai ang a ni.

¹⁶Thil ngaih dân thiam lo hotu chu mi hnehchhiahtu a ni ṭhîn a, Awhna hawtu erawh chuan a dam chhûng a tisei ang.

¹⁷Mi thisen phurtu chu Khuarkhurumah a tlân lût ang a; Tu mahin hum suh se.

¹⁸Tu pawh dik taka awm chu chhanchhuahin a awm ang a, Dik lo taka awm erawh chu a tlu thuai ang.

¹⁹A lei lettu chuan chhang a ngah ang a, Mi lêlo zuitu erawh chu a pachhe hle ang.

²⁰Mi rinawm chuan malsâwmna a ngah ang a, Hausak thuai tum erawh chu hrem lohvin a chhuak lo vang.

²¹Mi thlei bîk neih hi a ṭha lo va, Miin chhang them avângin an bawhchhe tûr a ni hek lo.

²²Mi fîr chuan sum a ûm a, A chungah tlâkchhamna a lo thleng dâwn tih a hre lo.

²³Leia mi fak dertu ai chuan, Mi zilhtu chuan a hnua fak a hlawh tam zâwk ang.

²⁴A nu emaw, a pa emaw rawka, “Bawhchhiatna a ni lo ve,” titu chu, Tiboraltu ṭhian a ni.

²⁵Mi rilru duhâm chuan inbeihna a chawk chhuak a, LALPAa rinna nghattu erawh chu tihthauvin a awm ang.

²⁶Mahni rilru ring maitu chu mi â a ni a, Fing taka chetla mi erawh chu chhanchhuah a ni ang.

²⁷Mi rethei thil petu chuan a tlachham lo vang a, Maimitchhînsantu erawh chuan ânchhia nasa tak a dawng ang.

²⁸Mi suaksual an dinchanin mite an biru a, An boralin mi fel an pung ṭhîn.