Read Mizo_Old_version Thufingte 29 Bible Online

Thufingte 29 - Mizo_Old_version bible

Thufingte 29

¹Zilhhau fo pawha a ring tikhawng tlat chu, Vawilehkhatah tihtliahin a awm ang a, tihdamna a awm lo vang.

²Mi fel an lo pun hian mite an lâwm ṭhîn a, Mi sualin rorêlna an chanin mite an rûm ṭhîn.

³Finna ngainatu chuan a pa lâwmna a thlen a, Nawhchizuar pâwltu chuan a sum a tirîral ṭhîn.

⁴Dik taka lalin ro a rêl chuan ram a phuisui a, Thamna a lâk chuan ram a chhe ṭhîn.

⁵A ṭhenawm fak dertu chuan A ke tân lên a zam a ni.

⁶Mi ṭha lote bawhchhiatnaah chuan thang a awm a, Mi fel erawh chu a zai a, a hlim.

⁷Mi fel chuan mi rethei thu a hriatsak a, Mi suaksual erawh chuan hriatna tûrin ngaihthiamna a nei lo.

⁸Hmusittu chuan khawpui a tialh a, Mi fing erawh chuan thinurna a tikiang ṭhîn.

⁹Mi fingin mi â a hnial chuan, A thinur emaw, a nui emaw, inremna a awm lo rêng rêng ang.

¹⁰Thisen chhuah châk mite chuan mi ṭha famkim an hua a, Mi dik takte erawh chuan a nunna humhim an tum ṭhîn.

¹¹Mi â chuan a thinur thu zawng zawng a sawi chhuak a, Mi fing erawh chuan an thup a, An ngawihpui ṭhîn.

¹²Rorêltuin dâwt thu a ngaihsân chuan, A chhiahhlawh zawng zawng an sual ṭhîn.

¹³Mi rethei leh hnehchhiahtu an awm dûn a, LALPAN an mit a tihvârsak ve ve a.

¹⁴Mi retheite rinawm taka rorêlsaktu lal chu, A lalṭhutthlêng chu kumkhuaa tihngheh a ni ang.

¹⁵Tiang leh zilhhaunain a tifing a, Naupang thlahthlam erawh chuan a nu zahna a thlen ṭhîn.

¹⁶Mi sual an lo punin bawhchhiatna pawh a pung ṭhîn a, Mi fel erawh chuan an tlûkna chu a la hmu ang.

¹⁷I fapa chu thunun fel la, chawlhna a pe ang chia, A ni, i rilru lâwmna a thlensak ang che.

¹⁸Inlârna a awm loh chuan mipui an tladah ṭhîn a, Dân zâwmtu erawh chu a nihlawh ṭhîn.

¹⁹Chhiahhlawh chu thu maia thunun mi a ni lo, Hre mah sela engah mah a ngai lo vang.

²⁰Thu sawi thuai thuai mi i hmu ṭhîn em? Chu mi ai chuan mi âah beisei tûr a awm tam zâwk.

²¹A naupan têt aṭanga chhiahhlawh duat chuan, A tâwpah in ro pawh a chuh ang.

²²Mi thinurin insualna a chawk chhuak a, Mi thinrimin bawhchhiatna a ngah ṭhîn.

²³Mi a chaponain a titlâwm ang a, Mi rilru inngaitlâwm chuan chawimawi a hlawh ang.

²⁴Rûkru kawppuitu chuan ama nunna a hua a ni; Chhechham ri a hria a, eng mah a sawi si lo.

²⁵Mi dang ngaih dân pawisak luat a hlauhawm a, LALPAa innghah erawh chu a him.

²⁶Mi tam takin rorêltute duhsak hlawh an tum a; Mahse, mihring chunga rorêlna chu LALPA hnên aṭanga lo chhuak a ni.

²⁷Mi fel lo chu mi fel ngaihin tenawm a ni a, Tin, dik taka awm mi chu mi suaksual tân tenawm a ni.