Read Mizo_Old_version Thufingte 3 Bible Online

Thufingte 3 - Mizo_Old_version bible

Thufingte 3

¹Ka fapa, ka dân chu theihnghilh suh la, I thinlungin ka thupêkte chu zâwm reng zâwk rawh se;

²Dam ni leh kum te, Thlamuanna te a pêk belhchhah dâwn che nia.

³Khawngaihna leh thutak chuan hnuchhawn che suh se; I nghâwngah zem tlat la, I thinlung phêkah ziak rawh.

⁴Tichuan, Pathian leh mihring mit hmuhah, Duhsakna leh hmingṭhatna i hlawh dâwn nia.

⁵I thinlung zawng zawngin LALPA ring la, Nangma hriatnaah innghat suh;

⁶I kawng zawng zawngah amah hre reng la, I kawngte chu a kawhhmuh zêl ang che.

⁷Mahni ngaihin intifing suh la; LALPA chu ṭih la, sual kalsan rawh.

⁸I lai atân hrisêlna a ni ang a, I ruh atân thlîng a ni ang.

⁹I sumin LALPA chawimawi la, I thil lo pung hmasa ber zawng zawngte nên;

¹⁰Tichuan, i buh in chu a lo khat liam ang a, I sâwrkhur chu uain tharin a luang liam ang.

¹¹Ka fapa, LALPA thununna che ngainêp suh la, A zilhhauna che ning hek suh.

¹² LALPA chuan a hmangaihte chu a zilhhau ṭhîn a ni, Pain fa a lawm apiangte a zilhhau ṭhîn ang hian.

¹³Finna hmuchhuaktu chu a nihlawh a, Hriat thiamna hmuchhuaktu pawh.

¹⁴Tangkaraw peipun aiin a peipun chu a ṭha zâwk si a, A hlêp pawh rangkachak ṭha mi aiin.

¹⁵Lunghlu sen mi aiin a hlu a; Thil i duhthusâm theih ang zawng zawng pawhin a hen lo.

¹⁶A kut ding lamah dam reina a awm a, A kut vei lamah sum leh ropuina.

¹⁷A kawngte chu nunkhaw nawmna kawng a ni a, A kawng zawng zawng chu thlamuanna a ni.

¹⁸A vuan apiangte tân nunna thing a ni a, A kawl reng apiangte chu an hamṭha e.

¹⁹ LALPA chuan finnain leilung a din a, Hriatnain vânte a tinghet a;

²⁰A thiamnain tuifinriatte a sah a, Chhûmte chuan dai a fartîr a.

²¹Ka fapa, i mit ata kiantîr suh la, Finna leh ngaihruat thiamna dik tak chu vawng tlat rawh;

²²I nunna atân nunna a ni ang a, I nghâwng atân khawngaihna.

²³Tichuan, i kawngah him takin i kal ang a, I ke chu a petek lo vang.

²⁴I mut hunin i hlau lo vang a, A ni, i mu ang a, tui takin i muhîl ang.

²⁵Hlauhna lo awm thutte chu hlau suh la, Mi suaksualte chunga ṭiauna a lo thlenin hlau hek suh.

²⁶ LALPA chu i himna a ni si a, I ke chu âwk lo tûrin a vêng dâwn a ni.

²⁷A phute tân ṭhatna ui suh, I kutah tih theihna a awm phawt si chuan.

²⁸I ṭhenawm hnênah, “Kal leh ta rih la, lo kal leh rawh, Naktûkah ka pe ang che,” ti suh, I kawl reng si chuan.

²⁹I ṭhenawm chungah thil ṭha lo suangtuah suh, Ngaihngam takin i kiangah a awm tih hre siin.

³⁰A vâng awm lovin mi sual mai suh, I pawi eng mah a khawih loh chuan.

³¹Mi nunrâwng awt suh la, A kawng a enga mah thlang suh.

³²Kawhmawh bâwl chîng chu LALPA ngaihin tenawm an ni si a; Mi ṭha famkim erawh chu a ṭhian an ni.

³³ LALPA ânchhia chu mi suaksual inah a awm a, Mi felte chênna erawh chu mal a sâwm ṭhîn.

³⁴Mi hmusittute chu a hmusit ṭhîn a, Inngaitlâwmte erawh chu khawngaihna a pe ṭhîn.

³⁵Mi fing chuan ropuina an rochung ang a, Mi âte kaisânna erawh chu mualphona a ni ang.