Read Mizo_Old_version Thufingte 30 Bible Online

Thufingte 30 - Mizo_Old_version bible

Thufingte 30

¹Jakea fapa Agura thute: Thufing chu. Miin Ethiela hnênah, Ethiela leh Ukala hnênah heti hian a ti,

²Mi ahluanah ka mâwl ber a, Mihringin hriat thiamna an neih hi ka nei lo.

³Finna ka zir lo va, Mi Thianghlima hriatna ka nei hek lo.

⁴Tu nge ni vâna chho tawha, Lo chhuk leha chu? Tu nge ni a kuta thli hûm khâwmtu chu? Tu nge ni a puana tui fûntu chu? Tu nge ni kâwlkil zawng zawngte tinghet? Tu nge ni a hming, tu nge ni a fapaa hming pawh i hria em?

⁵ LALPA thu zawng zawng chu fiah a ni tawh, Amah ringtu zawng zawng tân ani chu phaw a ni.

⁶A thute chu belhchhah suh; Chuti lo chuan, a lailang ang chia, Dawthei i lo ni dah ang e.

⁷Thil pahnih ka dîl chia, Ka thih hmain rem ti lul ang che.

⁸Thil lawilo leh dâwtte chu mi tihsawnsak daih ang che; Pachhiatna emaw, neihnunna emaw mi pe suh la, Ka tâna mamawh chawin mi châwm rawh;

⁹Chuti lo chuan, ka tlaipuar ang a, ka phat ang chia, “LALPA chu tu nge ni?” ka ti dah ang e; A nih loh vêk leh ka lo rethei ang a, rûk ka ru ang a, Ka Pathian hming ka tihliau dah ang e.

¹⁰Chhiahhlawh chu a pu hnênah rêl suh, Ânchhia a lawh ang chia, Thiam loh i hlawh dah ang e.

¹¹An pate ânchhia lawha, An nute malsâwm lo chhuan an awm.

¹²Mahni ngaiha thianghlim inti chhuan an awm a; Nimahsela, an bawlhhlawhna tlen fai a ni si lo.

¹³Ṭha inti êm êmte an awm a, Ṭha an va inti tehrêng êm!

¹⁴An hâ chu khandaih ang, an ha hnuai lam chemtê ang chuan an awm a, Leilung ata mi rethei leh mihring zîng ata mi renchhamte ei zo tûrin.

¹⁵“Mi pe rawh, mi pe rawh,” tia au fanu pahnih nei saihlît a awm a. Thil pathum, kham lêm nei lo a awm a, E, thil pali a ni, “A tâwk e,” ti ngai lote:

¹⁶Thlân leh chhûl ching, Tui khawpkham lo leilung leh, “A tâwk e,” ti ngai lo mei.

¹⁷A pa hmusittu leh A nu thu awih ngainêptu mit chu Phai choâkin an kher chhuak ang a, Mupuinoten an ei ang.

¹⁸Thil pathum ka tâna mak lutuk a awm a, E, thil pali a ni ka hriat loh chu:

¹⁹Boruaka mupui kawng, Lung chunga rûl kawng, Tuifinriata lawng kawng, Mipain nula a panna kawngte.

²⁰Chutiang chu a ni, hmeichhe uire hmang kawng chu; A ei a, a hmui a hru fai a, “Thil sual eng mah ka ti lo,” a ti ṭhîn.

²¹Thil pathum avângin leilung a khûr ṭhîn, Thil pali a ni, tuar theih lohte:

²²Chhiahhlawh chu lal a lo niha, Mi â chu buh leh saa a lo tlaia,

²³Hmeichhe huatthlala takin pasal a lo neiha, Chhiahhlawh nulain a pi ro a luahin.

²⁴Thil tê tham tê pali lei chungah hian a awm a; Mahse, an fing hle reuh mai:

²⁵Fanghmîr hi chak lo tak an ni a: Nimahsela, ṭhâlah an chaw tûr an khâwl khâwm ṭhîn;

²⁶Sazupui hi chhiaṭha tak an ni a; Nimahsela, lungpuiahte an awmna an siam ṭhîn;

²⁷Khaute hian lal an nei lo va; Nimahsela, a rualin an kal ṭhîn;

²⁸Daidêpte hi an kein an inham tâng ṭhîn a; Nimahsela, lal inah an awm ṭhîn.

²⁹Thil pathum an awm dâna ropui tak an awm a, E, pali a ni, an awm dâna ropui tak chu:

³⁰Sakeibaknei chu ramsa zîngah a chak ber a, Eng mahin a tilêt zo lo va;

³¹Uisathiam; kêlpa pawh; Lal, tu mah amah beitu awm lo chu.

³²Nangmah inchawisâng tûra thil âthlâk tak i lo tih tawh emaw, Thil ṭha lo i lo ngaihtuah tawh emaw a nih chuan, I kâ hup rawh.

³³Hnutetui chawhin hnutekhal a rawn tichhuak ang leh, Hnâr sâwra thi a lo chhuak angin, Tihthinur luihnain inhauna a hring ṭhîn.