Read Mizo_Old_version Thufingte 31 Bible Online

Thufingte 31 - Mizo_Old_version bible

Thufingte 31

¹Lal Lemuela thute, thufing, a nu zirtîrte chu.

²Ka fapa, aw ka rîla rah, Aw, ka chhechham fapa, lo ngaithla teh.

³I chakna chu hmeichhia pe suh la, Lal tichhe ṭhîn hnênah i nunnate pawh.

⁴Aw Lemuel, lalin uain in tûr a ni lo va, Rorêltuten, “Khawiah nge rakzû?” an ti tûr a ni hek lo.

⁵An in chuan dân an theihnghilh ang a, Mi retheite chungah ro an rêl dik lo dah ang e.

⁶Boral dâwn ṭêpte chu rakzu pe ula, Mi lungngai chu uain pe rawh u.

⁷In sela, a pachhiatna chu theihnghilh sela, A hrehawmzia chu hre reng lo rawh se.

⁸Ṭawngtheilote tân i kâ âng la, Hnuchhawnho zawng zawng chungchâng thu-ah te.

⁹I kâ âng la, fel takin rorêl la, Mi rethei leh renchhamte chungah rorêl rawh.

¹⁰Hmeichhe khawsak ṭha tu nge hmu thei ang? A man chu lunghlu sen mi aiin a sâng zâwk daih si a.

¹¹A pasal thinlung chuan a ring a, Chhawrna a hmai lo vang.

¹²A dam chhûngin Chhe lam ni lovin, ṭha lam hlîrin thil a tihsak ṭhîn.

¹³Berâm hmul leh la a zawng a, A kutin lungawi takin a thawk ṭhîn.

¹⁴Sumdâwng lawng ang a ni a, Ram hla tak ata ei tûr a la ṭhîn.

¹⁵Khawvâr hmain a tho va, A chhûngte ei tûr a pe ṭhîn a, A chhiahhlawh nulate hnênah an tih tûrte a hrilh ṭhîn.

¹⁶Huan tûr a ngaihtuah a, a lei a, Ama kutkawih ngeiin grêp huan a siam ṭhîn.

¹⁷Chaknain a kâwng a hrêng a, A bânte a tichak ṭhîn.

¹⁸A sumdâwnna a hlâwk tih a hria a, Zânah pawh a khâwnvâr a mit ngai lo.

¹⁹A kutin hmui kut a chelh a, A kutin hmuithal a vuan a.

²⁰A kut mi rethei lamah a phar a, A ni, renchhamte thlengin a ban phâk a.

²¹A chhûngte vûr a hlauhsak lo va; A chhûngte zawng zawng chu puan senlâr sinin an awm si a.

²²Chhuatphah puan mawi a insiam a, A silhfên chu lazai sîn mi leh puan senduk a ni.

²³Kulh kawngkaa an ram upate nên an ṭhut hovin, A pasal chu a hriat a ni.

²⁴Lazai sîn silhfên a siam a, a zuar ṭhîn a, Sumdâwngte hnênah kâwnghrênte a thawn ṭhîn.

²⁵A silhfên chu chakna leh ropuina a ni a, Hun lo la thleng tûr atân pawh a nui a.

²⁶Finnain a kâ a âng a, A kaah chuan ngilneihna thu a awm.

²⁷An chhûng khawsak dân a en ṭha a, Dâwngdahna chhang a ei lo.

²⁸A fate chu an tho va, “Engthâwli” an ti a; A pasal pawhin a fak a:

²⁹“Hmeichhe tam tak khawsak ṭha an awm a; Mahse, nang chuan i khûm vek a ni,” tiin.

³⁰Duhsakna hi bumna a ni a, hmêlṭhatna chu engmahlo a ni; LALPA ṭihtu hmeichhia erawh chu fak a ni ang.

³¹A kutkawih chhuah chu pe la, A thiltihin kulh kawngkaah chuan fak rawh se.