Read Mizo_Old_version Thufingte 4 Bible Online

Thufingte 4 - Mizo_Old_version bible

Thufingte 4

¹Ka fapate u, pa zirtîrna chu ngaithla ula, Hriat thiamna chu hre tûrin ngaithla rawh u;

²Zirtîrna ṭha tak ka fah si che u a; Ka zirtîrna hi hawisan suh u.

³Ka pa fapa ka ni a, Ka nu fa, fapa mal duata duat ka ni a.

⁴Mi zirtîr a, ka hnênah, “I thinlung chuan ka thute hi vawng reng sela; Ka thupêkte hi zâwm la, nung rawh,” a ti a.

⁵Finna nei la, hriat thiamna nei rawh; Theihnghilh suh la, Ka kâa thu chhuakte hi chhiat lam pansan suh.

⁶Hawisan suh la, a humhim ang che; Hmangaih la, a vêng ang che.

⁷Finna hi thupui ber a ni a; Chuvângin, finna hi nei rawh; A ni, i thil neih zawng zawng chân pawhin finna hi nei rawh.

⁸Chawimawi la, anin a chawisâng ang che; I lawm chuan zahawmah a siam ang che,

⁹Khawngaihna lukhum i lu a khumtîr ang a, Mawina lallukhum a pe ang che.

¹⁰Aw ka fapa, ka thu ngaithla la, pawm rawh; Tichuan, i dam chhûng kum a lo tam ang.

¹¹Finna kawng ka zirtîr chia, Ṭhatna kawngah ka hruai chia.

¹²I kal laiin i pheichheh a zâng ang a; I tlân pawhin i petek lo vang.

¹³Zirtîrna chu vuan tlat la, chhuah suh; Vawng tlat rawh, i nunna a ni si a.

¹⁴Mi suaksual kawngah chuan lût suh la, Mi sual kawngah chuan kal suh.

¹⁵Pumpelh la, a kiangah kal suh; Hawisan la, kal zêl rawh.

¹⁶Pawi an khawih phawt loh chuan an mu ngai lo va, Tute emaw tal chhiatna an thlensak loh chuan an mut a chhuak thei lo.

¹⁷Suahsualna chhang an ei a, Nunrâwnna uain an in ṭhîn.

¹⁸Mi felte kawng erawh chu zîng êng, chhûn vânglai tak thlenga êng zual deuh deuh ang hi a ni.

¹⁹Mi suaksualte kawng chu a thim a, Eng nge an chhuih an hre lo.

²⁰Ka fapa, ka thu ngaithla la, Ka thusawiah i beng dawh rawh.

²¹I mit hmuh ata chhuahtîr suh, I thinlung lai takah pai rawh.

²²A hmutute tân nunna a ni a, An tisa zawng zawng tân hrisêlna a ni si a.

²³Thil dang ber aiin i thinlung vêng ṭha rawh, Nunna lo chhuahna a ni si a.

²⁴Ṭawng chaltlai bânsan la, Mi bum chîng suh.

²⁵I mitin hma lam en la, Ngîl takin hma lam thlîr rawh.

²⁶I ke tân kawng tirualrem la, I kawng zawng zawng tihngheh ni rawh se.

²⁷Ding lamah emaw, vei lamah emaw pêng suh; Sual ata i ke sawn rawh.