Read Mizo_Old_version Thufingte 5 Bible Online

Thufingte 5 - Mizo_Old_version bible

Thufingte 5

¹Ka fapa, ka finna ngaithla la, Ka hriatnaah i beng dawh rawh;

²Ngaihruat thiamna i vawna, I leiin hriatna a vawn theih nân.

³Hmeichhe sual hmui ata khawizû a far a, A hmui chu hriak aiin a nâl si;

⁴A tâwpna erawh chu sai angin a khâ a, Khandaih hriam tawn angin a hriam.

⁵A ke chu thihnaah a chhuk a, A ke pênin Seol lam a pan.

⁶Chutichuan, nunna kawng rualrem a hmu lo va, A kawngte chu a nghet lo va, a hre si lo.

⁷Chuvângin, ka fapate u, ka thu ngaithla ula, Ka kaa thu hi hawisan teh suh u khai.

⁸I kawng chu a hnên ata sawn daih la, A kawngka va hnaih suh.

⁹Chuti lo chuan, i ropuina chu mi dang a pe ang a, I kumte chu mi nun chhia i pe dah ang a,

¹⁰Ramdangmite chu i thahruiin i titlai ang a, I thawh rimna chu hmêlhriat loh inah a awm dah ang e.

¹¹Tin, i tisa leh i taksa a ral hunin, I hun tâwp lamah chuan i ṭap ang a,

¹²“Engtiziaa zirtîrna chu ka lo huata, Ka thinlungin zilhhauna chu lo ngainêp nge maw ni aw?

¹³Mi zirtîrtu thu lah ka lo awih ta hek lo va, Mi zirtîrtute chungah ka beng ka lo dawh ta bawk hek lo;

¹⁴Mipuite leh pung khâwmho zîngah chuan, Ka lo thih teuh hle chu le!” i la ti ang.

¹⁵I tuibêl ata tui in la, I tuichhunchhuaha tui tharlâm chu.

¹⁶I tuihnate chu ram tina luang darhin, Kawtthlêrah te lui tui a luang dâwn em ni?

¹⁷I tân chauh ni sela, Ramdangmite ṭâwmpui lohvin.

¹⁸I tuichhunchhuah chu malsâwmin awm sela, I tleirâwl lai nupuiah chuan hlim rawh.

¹⁹Zukpui duhawm tak leh zukchal nalh tak angin, Eng lai pawhin a ṭâng chhûng chuan tilungawi fo che sela, A hmangaihnaah chuan lâwm fo rawh.

²⁰Eng atân nge, nang, ka fapa chuan hmeichhe sual i lawm anga, A ṭâng i pawm ang?

²¹Mihring kawngte chu LALPA mit hmuhah a awm a, A kawng zawng zawng a tihrualremsak ṭhîn.

²²Ama khawlohna ngeiin mi suaksual chu a man ang a, A sualna hruizêna thlunin a awm ang.

²³Zirtîrna tlâkchham vângin a thi ang a, A ât êm avângin a bo vang.