Read Mizo_Old_version Thufingte 6 Bible Online

Thufingte 6 - Mizo_Old_version bible

Thufingte 6

¹Ka fapa, i ṭhenawm tâna mawhphurtua i lo ṭana, Ramdangmi vuak nâna i kut i hman chuan,

²I ṭawngka chhuakah i âwk a, I ṭawngka chhuakin a man che a ni.

³Ka fapa, i ṭhenawm kutah i awm tih inhriain hei hi ti la, intichhuak rawh; Kal la, intihnuai la, i ṭhenawm chu luh ngut ngut rawh.

⁴I mit chu muthilhtîr suh la, I mit vun mutthlûktîr hek suh.

⁵Sa pêltu laka sakhi a tlân chhuak ang leh, Sava vehtu laka sava a thlâwk chhuak angin intichhuak rawh.

⁶Nang, thatchhepa, fanghmîr tih dânte chhût la, fing rawh;

⁷Anni chuan lal te, hotu te, rorêltu te nei lovin,

⁸Nipuiah chaw an chhêk khâwm a, A seng hunin an ei tûrte an sêng khâwm ṭhîn.

⁹Aw, thatchhepa, eng chen nge i mut dâwn? Eng tikah nge i muhîl chu i thawh dâwn?

¹⁰I duh chuan mu hlek la, chhîng hlek rawh, Kut kuangkuahin châwl hlek teh;

¹¹I mut hlânin i rethei hman ang a, Tlâkchhamnain sipai angin a rawn nang thut ang che.

¹²Mi tlâktlai lo, mi khawlo chu, Ṭawng chaltlai nên a vâk vêl a;

¹³A mit a siai a, a kein thu a sawi a, A kutzungṭangin a zaizir ṭhîn.

¹⁴A thinlungah luhlulna a awm a, thil sual a suangtuah reng a, Inrem lohna a tuh ṭhîn.

¹⁵Chuvângin, a chhiatna a lo thleng thut ang a, Vawilehkhatah tihchhiatin a awm ang a, tihṭhat leh theih tawh lohvin.

¹⁶Thil paruk LALPAN a huat ṭhin a awm a, A ni, pasarih a ten zâwng tak a awm:

¹⁷Mit chapo te, lei dawthei te, Pawi khawih lo thisen chhuahna kut te,

¹⁸Thil ṭha lo suangtuah ṭhîn thinlung te, Pawi khawih tûra ngal chak te,

¹⁹Hretu der dâwt sawi ṭhîn te, Unau kâra inrem lohna tuhtute hi.

²⁰Ka fapa, i pa thupêk chu zâwm la, I nu zirtîrna chu hawisan suh.

²¹I thinlungah thlung reng la, I nghâwngah awrh rawh.

²²I vah vêlin a hruai ang chia, I mut hunin a vêng ang chia, I thawh hunin a bia ang che.

²³Thupêk chu khâwnvâr a ni a, dân chu êng a ni si a; Tin, zirtîrnain a zilhhauna chu nunna kawng a ni;

²⁴Hmeichhe khawlo lakah leh, Hmeichhe sual kam thlum laka vêng tûr chein.

²⁵I thinlungin a mawina ît suh la, A men novin hîp che suh se.

²⁶Nawhchizuarnu avângin pa chhang themah a chang a, Uirenu chuan nunna hlu tak a zawng ṭhîn.

²⁷Miin a puan kâng lovin mei a pawm thei em ni?

²⁸Miin a ke kâng lovin meiling a rap thei em ni?

²⁹Chutichuan, mi a ṭhenawm nupui hnêna kala, Tu pawh amah va khawih chu hrem lohvin a chhuak lo vang.

³⁰Miin a rilṭâm tihreh nâna rûk a rûk chuan an hmusit ṭhîn lo va;

³¹Nimahsela, an hmuhchhuah chuan a leh sarihin a rûl ang; A ina a sum zawng zawng a pe ang.

³²Mi nu uiretu chuan hriatna a nei lo a ni, Ama nunna tichhe tûr thil a ti a ni.

³³Hliam a tuarin a hminghliau vang a, A hming a chhe hlen bawk ang.

³⁴Thîkthuchhiatna chu mipa thinrimna a ni a, Phuba lâk ni chuan a zuah lo vang.

³⁵Tlanna chu engah mah a ngai lo vang a; Thilpêk tam tak pe mah la, a lung a awi chuang lo vang.