Read Mizo_Old_version Thufingte 7 Bible Online

Thufingte 7 - Mizo_Old_version bible

Thufingte 7

¹Ka fapa, ka thu pawm la, Ka thupêkte khâwl khâwm rawh.

²Ka thupêkte zâwm la, nungdamin awm rawh; Ka dân chu mitnautê angin vawng rawh.

³I zungṭangah bun la, I thinlung phêkah ziak rawh.

⁴Finna hnênah chuan, “Ka farnu i ni,” ti la, Hriatna chu i laichînnu vuah rawh;

⁵Hmeichhe sual lakah vênga, Hmeichhe khawlo thlêmna laka vêng tûr chein.

⁶Ka ina tukverh zâwngdaikalh âwng aṭang chuan ka han thlîr a,

⁷Mi mâwl tlangvâl zîngah chuan, Tlangvâl hriatna nei lo ka hmu a,

⁸A awmna lam hnaih kawtthlêrah chuan a kal ṭan a, A in lam a pan ta a,

⁹Tlai lam thimhmulah, zân thim, thim tak hnuaiah.

¹⁰Ngai teh, nawhchizuar anga inthuam leh fin vervêk rilru pu hmeichhiain a tâwk a.

¹¹A awm hle hle thei lo va, a tum a ruh a, A ke chuan a ina awm a duh lo va,

¹²Kawtthlêrah te, pêng ṭhuam laiah te a awm a, Kil tin kil tangah a châng ṭhîn.

¹³Chutichuan, a man a, a fâwp a, Tlângnêl tak hmêl puin a hnênah,

¹⁴“Remna thilhlan inthawinate ka hlân tûr a ni a, Vawiinah ka thutiam ka hlen ta a.

¹⁵Chuvângin, nangmah tawh tum chein ka lo kal a ni, Ngun taka zawn tum chein; tin, ka hmu ta chia.

¹⁶Ka khumah âwngphah mawi tak ka phah a, Aigupta ram lazaia ṭial.

¹⁷Ka khum chu beraw te, aloe te, thakthîngtein ka tirimtui a.

¹⁸Hawh teh, zankhuain hmangaihna duhtâwkin i chên ang khai, Hmangaihnain inhnêm ang.

¹⁹In neitupa lah a awm si lo, Hla takah a zin a;

²⁰Tangka ip a keng a, Thla hlei nga hunah a lo haw dâwn a ni,” a ti a.

²¹A ṭawngkam thiamin a thlêm thlu a, A infak mawinain a hruai bo ta a.

²²A zui ta nghâl mai a, Bâwng, a talhna hmuna a kal ang leh, Mi â tihfin tûra kawl bun tûra a kal ang leh,

²³Savain a thihna tûr a ni tih hre lova, Thalin a thin a dawh tlang thlenga thang lam a pan angin.

²⁴Chuvângin, ka fapate u, ka thu hi ngaithla ula, Ka kaa thu chhuakte hi pawm rawh u.

²⁵I thinlungin a kawngte chu âwn suh sela, A kawngahte chuan kal bo suh.

²⁶Mi tam tak a hliam a, A ni, a thahte chu tam tak an ni.

²⁷A in chu Seol kawng a ni a, Thihna pindan a zuk chhun a.