Read Mizo_Old_version Thufingte 8 Bible Online

Thufingte 8 - Mizo_Old_version bible

Thufingte 8

¹Finna chu a auvin, Hriatna chuan a aw a chhuah lo vem ni?

²Kawng sîr hmun sâng chungahte, Kawng pêng ṭhuamahte a ding ṭhîn a;

³Khaw tawntirh kawngkaah, Khaw luhna kawngka bulah te ring takin a au va:

⁴“Aw, nangni mihringte u, Ka auh che u hi, Ka aw chu mihring fate tân a ni.

⁵Aw, nangni mi mâwlte u, Remhriatna hi lo hre thiam teh u; Nangni mi âte u, finna thinlung nei mi lo ni rawh u.

⁶Ngaithla rawh u, thil ṭha tak mai ka sawi dâwn a ni, Ka thusawite chu thil dik hlîr a ni ang.

⁷Ka kâ chuan thutak a sawi chhuak ang a; Suahsualna chu ka hmui tân thil tenawm a ni.

⁸Ka kâa thu zawng zawngte chu a fel vêl vek a ni, Thu kawi leh bengtlalo rêng rêng a awm lo.

⁹Hre thiamte tân a fiah vek a, Finna hmutute tân a dik vek a ni.

¹⁰Ka zirtîrnate dawng rawh u, tangkarua te ni lovin; Tin, finna chu rangkachak duhawm mi ai pawhin.

¹¹“Finna chu lunghlu sen mi aiin a ṭha zâwk si a; Duhthusâm theih thil zawng zawng pawh a hen zo a awm lo.

¹²Kei, finna chuan ka chên nân remhriatna ka siam a, Finna leh ngaihruat thiamna ka hre chhuak ṭhîn.

¹³ LALPA ṭih chu sual huat hi a ni; Chapona te, uanthuanna te, thil ṭha lo tih chîn te, Ṭawng chaltlai te hi ka haw takzet a ni.

¹⁴Remruat leh hriatna dik hi ka ta a ni a; Hriat thiamna ka ni a, chak tak ka ni.

¹⁵Kei mi hmangin lalin ro an rêl a, Hotuten rorêlna felin thu an titlu ṭhîn.

¹⁶Kei mi hmangin hotuten ro an rêl a, Mi lian te, leilunga rorêltute zawng zawng pawhin.

¹⁷Mi hmangaihtu chu ka hmangaih a, Ṭhahnemngai taka mi zawngtute chuan mi hmu ang.

¹⁸Sum leh ropuinate ka hnênah a awm a, A ni, sum leh felna tlo tak mai chu.

¹⁹Ka rah chhuah chu rangkachak aiin a ṭha zâwk a, a ni, rangkachak ṭha mi ai pawhin; Ka lâk luh chu tangkaraw ṭha mi aiin.

²⁰Felna kawng ka zawh a, Rorêlna kawng takah;

²¹Mi hmangaihtute chu sum ka rochuntîr theih nân leh, An ro bâwmte ka tihkhah theih nân.

²²“LALPA chuan a thil siam bul berah mi din a, Hmasânga a thil siam bul berah.

²³Chatuan ata, a tîr têa din ka ni, Leilung awm hma rêngin.

²⁴Tuifinriat la awm hma daihin ka piang tawh a, Tuikhur tui tam tak la awm hma daihin.

²⁵Tlâng liante an din hma leh, Tlâng tête awm hmain ka piang tawh a;

²⁶Leilung a la din hma leh ram te a din hma, Khawvêla vaivut pawh a la awm ṭan hma daihin.

²⁷Vânte a tihngheh laiin ka awm tawh a, Tuifinriat chunga kal hualna a siam laiin,

²⁸Chung lam vân a tihngheh laiin, Tuifinriat a lo ngheh laiin;

²⁹Tuite chuan a thupêk an bawhchhiat lohna tûra tuifinriat rite a siamsaka, Leilung nghahchhan a ruat lai khân.

³⁰Chutih lai chuan mi themthiam angin a kiangah ka awm a; Ni tin a lâwmna ka ni a, A bulah ka hlim êm êm bawk ṭhîn.

³¹Chên theihna leilungah hlim taka awmin, Ka lâwmna chu mihring fate chungah a ni.

³²“Khai le, ka fapate u, ka thu ngaithla rawh u, Ka kawng zawhtute chu mi nihlawh an ni si a.

³³Zirtîrna chu ngaithla ula, fing ula, Duh lo suh u.

³⁴Ka kawngka bula nghâka, Ka kawt hungna kawngkaa ni tin nghâk renga, Ka thu ngaithlatu chu a eng a thâwl e.

³⁵Mi hmu apiang chuan nunna a hmu a ni si a, LALPA duhsakna a dawng ang.

³⁶Amaherawhchu, ka chunga sual apiang chuan ama nunna a tikhawlo va; Mi hua apiang chuan thihna an duh a ni.”