Read Mizo_Old_version Thufingte 9 Bible Online

Thufingte 9 - Mizo_Old_version bible

Thufingte 9

¹Finna chuan a in a sa a, A ban pasarih a phun a;

²A rante a talh a, a uain te a chawhpawlh a, A dawhkânah pawh ei tûr a hlui a.

³A nulate a tîr chhuak a, Khuaa hmun sâng ber berah a au va,

⁴“Mi mâwl apiang chu he lamah hian lo kal rawh se,” tiin. Tin, hriatna nei lote chu,

⁵“Lo kal ula, ka chhang ei ula, Ka uain chawhpawlh chu in rawh u.

⁶Aw, nangni mi mâwlte u, âtna kawng chu chhuahsan ula, nung rawh u; Tin, hriatna kawngah chuan kal rawh u,” a ti a.

⁷Hmuhsit chîng zilhtu chuan tihtauh khumna a tâwk ṭhîn a, Mi suaksual zilhtu chuan kut tuarna a insiam ṭhîn.

⁸Hmuhsit chîng mi chu zilh suh, a haw dah ang che; Mi fing zilh la, a hmangaih ang che.

⁹Mi fing zilh la, a fing lehzual sauh dâwn nia; Mi fel zirtîr la, thiamnaah a lo pung dâwn nia.

¹⁰ LALPA ṭih hi finna bul a ni a. Mi Thianghlima hriatna hi hriat thiamna a ni.

¹¹Keimahin i nite chu tihpun a ni ang a, I dam chhûng kumte chu a pung ang.

¹²I lo fin chuan, i tâna fing i lo ni ang, Hmusittu i nih chuan nangmah chauhvin i tuar ang.

¹³Hmeichhe â chu a awm hle hle thei lo va, A mâwl a, eng mah a hre lo.

¹⁴A kawngkaah a ṭhu ṭhîn a, Khuaa hmun sângtea ṭhuphahah chuan;

¹⁵Kawnga lo kal apiangte chu,

¹⁶“Mi mâwl apiangte chu he lamah lo kal rawh u,” tia ko tûrin; Tin, hriatna nei lote hnênah chuan,

¹⁷“Rûk tui chu a thlum a, A rûka chhang ei chu a tui a ni,” a ti a.

¹⁸Nimahsela, chutah chuan mitthi an awm tih leh, A mi sâwmte chu Seol rila awm an nih a hre lo.