Read Mizo_Old_version Thuhriltu 1 Bible Online

Thuhriltu 1 - Mizo_Old_version bible

Thuhriltu 1

¹Jerusalem lal, Davida fapa, Thuhriltu thute chu.

²Thuhriltu chuan, “Engmahlo mai mai, Thil zawng zawng hi engmahlo mai a lo ni,” a ti a.

³Mihringin a hnathawh, ni hnuaia a thawhah chuan hlâwkna eng nge a hmuh?

⁴Chhuan khat an liam a, chhuan dang an lo chhuak a, Lei hi erawh chu a awm reng mai.

⁵Ni pawh chu a lo chhuak a, tin, a tla leh a, A chhuahna tûr lam panin a hmanhmawh ṭhîn.

⁶Thli chu chhim zâwngin a tleh a, hmâr hawiin a lo lêt leh a; A tleh vêl a tleh vêl a; tin, a bial ngaiah a kîr leh ṭhîn a.

⁷Lui zawng zawngte chu tuipuiah an luang lût a; Mahse, tuipui chu a khat chuang lo; Luite chu an luanna ṭhin lamah chuan an luang reng a.

⁸Thil zawng zawng hi ninawm mai mai a ni; sawiin a siak lo ve: Mit chu a thil hmuhah a tlai lo va, Beng pawhin a thil hriat a kham hek lo.

⁹Thil lo awm tawh chu lo awm tûr rênga kha a ni a, Thil tih tâkate chu tih tûr rêng kha a ni: Ni hnuaiah hian thil thar rêng rêng a awm lo ve.

¹⁰Miin, “En rawh, hei hi a thar a ni,” a tih theih rêng rêng a awm em ni? Kan awm hma daiha lo awm tawh rêng a ni.

¹¹Tûn hma thil tu mân an hre reng lo va. Nakinah pawh tûnlai thil hi an hre reng lo vang.

¹²Kei, thuhriltu hi Jerusalem-a Israel-te lal ka ni tawh.

¹³Tin, vân hnuaia thiltih tâk zawng zawng chungchâng chu finna hmangin fiah leh hmuchhuak tûrin ka rilru ka lo hmang ta a: Pathianin mihring fate hnêna buaipui tûra a lo pêk hi hna hrehawm tak a ni.

¹⁴Ni hnuaia thiltih tâk zawng zawngte chu ka hmu ta a; tin, ngai rawh, thil zawng zawng hi engmahlo leh thil lothlâwn mai a lo ni.

¹⁵A kawi tawh kha chu tihngîl theih a ni lo va, A awm lo chu chhiar rual a ni lo.

¹⁶“Ka hmaa Jerusalem-a awmte zawng zawng aia nasain finna ka nei alâwm maw! Ka rilru pawhin finna leh hriatna a nei nasa rêng a ni,” ka inti a.

¹⁷Tin, ka rilru hi finna hre tûr leh âtna leh fin lohna hre tûr pawhin ka hmang a. Hei pawh hi thil lothlâwn mai a lo ni tih ka lo hre ta.

¹⁸Finna a nasat poh leh buaina a tam a, Hriatna a pun poh leh manganna a pung.