Read Mizo_Old_version Thuhriltu 12 Bible Online

Thuhriltu 12 - Mizo_Old_version bible

Thuhriltu 12

¹I vânglai hian i Siamtu hre reng rawh - Ni ṭha lote a lo thlen hma leh, “Lâwmna rêng rêng ka nei lo ve,” I tihna tûr kumte a lo hnaih hma hian:

²Ni te, êng te, thla te, arsite a thim hma leh Ruah hnua chhûm a lo kîr leh hma hian;

³In vêngtu chu a lo khurha, Mi chakte chu an kaikûna, An tlêm avânga râwt sawmtu nute an bâna, Tukverha dâk nute chu an thima,

⁴Kawtthlêra kawngte a inkhâr ni chuan, Râwt sawmna ri a lo chuaia, Sava thâwmah mi a thawha, Zai nu zawng zawngte an lo zuai lai hian;

⁵A ni, a sâng chu an hlau va, Kawngah hlauhawm a awm a, Vaiumkhal thing a pâr a, Khau chu hnawksak a ni a, Chakna a bo va, mi chu a chatuan in lamah a hâwngin, Lusûnte chu kawtthlêrah an vâk vêl si a;

⁶Tangkaraw zai chu a chaha, Rangkachak berhbu chu a keha, Hlumbêl chu tuikhurah a keha, Tawlailîr chu tuikhuah bulah a tliah hma hian.

⁷Vaivut chu a awm angin leiah a chang leh a, Thlarau chu a petu Pathian hnênah a kîr leh a ni.

⁸Thuhriltu chuan, “Engmahlo mai mai, Thil zawng zawng hi engmahlo mai a lo ni,” a ti a.

⁹Tin, a fing chauh pawh ni lovin, Thuhriltu chuan mite hriatna a zirtîr a; a ni, thufing tawi tam tak a ngaihtuah a, a zawng chhuak a, a rem fel a.

¹⁰Thuhriltu chuan thu pawm tlâk hmu tûrin a zawng a, tlang taka ziak, thutak thute chu.

¹¹Mi fing thu chu berâmputen ran khalh nâna an hman tiang zum ang a ni a, thufing lâwr khâwm chu thîr kilhna khen bûr tlat anga nghet a ni.

¹²Chu chauh pawh ni lovin, hêngah hian, ka fapa, zilhin awm ta che. Lehkhabu tam tak siam hi tâwpintai a awm lo ve, nasa taka zir pawh hi tisa chauhna mai a ni.

¹³Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai.

¹⁴Pathian chuan thiltih zawng zawng chungah ro a la rêl dâwn si a, thil inthup engkim, a chhia emaw, a ṭha emawte pawh, tih hi.