Read Mizo_Old_version Thuhriltu 2 Bible Online

Thuhriltu 2 - Mizo_Old_version bible

Thuhriltu 2

¹Ka rilruin, “Khawi nge! Nuamsip bâwl ka han chîng teh ang, a nuam teh rêng emaw!” ka ti a; mahse, hei pawh hi eng a lo ni lo.

²Nuih hi a âtthâkzia ka chhar chhuak a, hlimhlawp lah eng ruai a ni lo.

³Vân hnuai mihring fate dam chhûng tawi tê hman ral dân ṭha ber a ni law maw tiin, finna zawngin uaina intihhlima nuam tâwl ka tum ta a.

⁴Hna nasa tak ka thawk a; inte ka insak a, grêp huante ka insiam a,

⁵huante leh ngaw nuamte ka insiam a, tah chuan theikûng zawng zawngte ka phun a.

⁶Ngawa thing ṭhang laite châwm nân dîlte ka siam a.

⁷Chhiahhlawhpate leh chhiahhlawhnute ka lei a, ka ina piang chhiahhlawhte ka nei bawk a; bâwng rualte leh berâm rualte pawh ka nei ṭeuh va, ka hmaa Jerusalem-a lo awmte zawng zawng aia nasain.

⁸Tangkarua leh rangkachakte leh lalte ro leh ram bial ro ṭha bîkte ka la khâwm a; hmeichhe zai mi leh mipa zai mite ka siam a, mipa fate lâwm zawng hmei tam tak nên.

⁹Chutichuan, ka lo ropui a, ka hmaa Jerusalem-a awmte zawng zawng chu ka khûm a; ka finna pawh a ngai reng a ni.

¹⁰Tin, ka mit îtzâwng apiang chu ka hlah lo va, ka thinlung pawh eng lâwmnaah mah ka sûm lo; ka thawh rimna zawng zawng avângin ka thinlung a lâwm si a; chu chu ka thawh rimna zawng zawnga ka lâwmman a ni.

¹¹Tichuan, ka kutchhuak zawng zawngte leh ka thawh rimnaa ka thiltih zawng zawngte ka han en hian, ngai teh, thil zawng zawng hi engmahlo leh thil lothlâwn mai a lo ni a, ni hnuaiah hian hlâwkna rêng rêng a lo awm lo ve!

¹²Tichuan, fin emaw, ât emaw, tlawktlaw emaw eng nge lêm chuang tih ka ngaihtuah a; lal pawhin a hmaa lalte tih tawh bâk eng nge a tih theih chuan?

¹³Thim aiin êng a ṭha angin, ât ai chuan fin a ṭha;

¹⁴mi fing chuan a kalna a hria a, mi â chuan a hre lo va; mahse, khawrêl thuhmun an zaa chungah a thleng tho tih ka hria.

¹⁵Tin, ka rilruah chuan, “Mi a chunga thleng ang bawk chu ka chungah pawh a thleng dâwn a, eng atân nge ka fin bîk le?” ka inti a. Tichuan, ka rilruah chuan, “Hei pawh hi engmahlo mai a lo ni,” ka ti a.

¹⁶Mi fing pawh, mi â pawh, kumkhuaa hriat rengna chu a awm si lo; ni lo la thleng tûrahte chuan an vaia theihnghilh daih an ni dâwn si a. Mi â ang bawka mi fing pawh a thih tûrzia mai chu!

¹⁷Tichuan, nun hi ka hua a ni; ni hnuaia thiltih rêng rêng hi mi tilungngaitu vek a nih avângin: thil zawng zawng hi engmahlo leh thil lothlâwn mai a lo ni si a.

¹⁸Tichuan, ni hnuaia ka thawh rimna zawng zawnga ka thiltihte chu ka haw ta, ka hnua lo awm tûra tân chuan ka hnutchhiah tûr a ni mai si a; mi fing a nih leh mi â a nih pawh tu nge hria ang?

¹⁹Mahse, ka thawh rimna zawng zawnga ka thiltihte chungah leh ni hnuaia finna hmanga ka thawh rim rah zawng zawng neitu a ni mai dâwn si a. Hei pawh hi engmahlo mai a lo ni.

²⁰Chutichuan, ka han hawi vêl a, ni hnuaia ka thawh rimna zawng zawnga ka thawh tâkte chungchângah chuan ka thinlung bei ka tidawng ta.

²¹Mi, finna leh hriatna leh thiamnate nêna thawk rimtu chuan, thawk ve hauh lo mi hnênah a rochun atân a hnutchhiah mai tûr a ni. Hei pawh hi engmahlo leh thil ṭha lo tak a ni.

²²Miin a thawh hahna zawng zawngah leh rilru rim taka ni hnuaia a thawhnaah chuan eng nge a hmuh?

²³A dam lai ni zawng zawngte chu tuarna hlîr a ni a, a hnathawhte lah vuivaina mai a ni si a; zânah pawh a rilru a hahdam chuang hek lo. Hei pawh hi engmahlo mai a lo ni.

²⁴Mihring tân chuan ei leh in te leh a thawh rimnaa a rilru tihnawm te aliama ṭha a lo awm lo. Hei pawh hi Pathian kuta mi a ni tih ka lo hre ta.

²⁵Amah lovin tu nge ei leh bâr leh intinuam thei awm ang?

²⁶Amah tilungnitu hnênah chuan finna te, hriatna te, lâwmna te a pe si a; mi sualte erawh chu, Pathian tilungnitu hnêna la pêk chhâwn tûr lâk khâwm leh chhêk khâwm hna a pe zâwk a ni. Hei pawh hi engmahlo leh thil lothlâwn mai a lo ni.