Read Mizo_Old_version Thuhriltu 3 Bible Online

Thuhriltu 3 - Mizo_Old_version bible

Thuhriltu 3

¹Engkim tân hian hun ruat a awm a, vân hnuaia thiltih zawng zawng tân hun remchâng a awm:

²Pian hun a awm a, thih hun a awm; Phun hun a awm a, thil phun phawi hun a awm;

³Tihhlum hun a awm a, tihdam hun a awm; Ṭhiat hun a awm a, siam leh hun a awm;

⁴Ṭah hun a awm a, nuih hun a awm; Sûn hun a awm a, lâm hun a awm.

⁵Lung paih darh hun a awm a, lung lâk khâwm hun a awm; Pawm hun a awm a, pawm loh hun a awm;

⁶Zawn hun a awm a, tihbo hun a awm; Vawn ṭhat hun a awm a, paih bo hun a awm;

⁷Tihthlêr hun a awm a, ṭhui hun a awm; Ngawih hun a awm a, ṭawng hun a awm;

⁸Hmangaih hun a awm a, huat hun a awm; Indo hun a awm a, muan hun a awm a ni.

⁹Hnathawktuin a thawh rimna ata eng hlâwkna nge a hmuh?

¹⁰Pathianin mihring fate hnêna buaipui tûra hna a lo pêk chu ka hmu ta.

¹¹Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tîr ata a tâwp thlenga thil a tih chu an hmuchhuak thei chuang lo.

¹²Hlim taka awma, an nun chhûnga thil ṭha an tih aliama an tâna ṭha zâwk eng mah ka hre lo.

¹³Tichuan, mi tin ei leh in leh an thawh rimna zawng zawnga hlim taka an awm chu Pathian thilpêk a ni.

¹⁴Pathianin a tih apiang chu a awm hlen ang tih ka hria. Eng mah belh theih a ni lo vang a, lâk ṭhen theih pawh a ni hek lo vang. Mihringin amah an ṭih theih nân Pathianin chutiang chuan a ti a ni.

¹⁵Thil awm mêkte hi lo awm tawh sa kha a ni a; thil lo awm tûrte chu lo awm tawh sa bawk kha a ni; Pathian chuan a bo tawhte kha a rawn la kîr leh zêl a ni.

¹⁶Tin, chu lo pawh chu, ni hnuaiah rorêlna hmuna suahsualna awm leh dikna hmuna suahsualna awm chu ka hmu bawk a.

¹⁷Ka rilruah chuan, “Pathianin mi fel leh mi suaksualte ro pawh a rêl ang, thil tinrêng atân hun a awm si a,” ka ti a.

¹⁸“Mihring fate chungthuah chuan, ramsa mai an ni tih an inhriat theih nân Pathianin anmahni a fiah a ni,” ka ti rilru a.

¹⁹Mihring fate chunga khawrêl leh ramsate chunga khawrêl chu thuhmun a ni si a, khawrêl thuhmun an chungah a tla a ni, pakhat a thih ang bawkin a dang pawh kha a thi a; an zain thâwk dân thuhmunin an thaw a, mihring chu ramsa aiin a chungnung lêm lo; thil zawng zawng hi engmahlo mai a lo ni si.

²⁰An zain hmun khatah an kal vek a; an zain vaivuta mi an ni vek a, an zain vaivutah an chang leh vek a ni.

²¹Mihring fate thlarau chu chung lamah a chho emaw, ramsa thlarau chu hnuai lamah leiah a chhuk emaw tih tu nge hria?

²²Chu vâng chuan mihring chu a thiltihah a lâwm aliama ṭha eng mah a awm lo, tih ka hmu a ni; chu chu a chanvo a ni mai; a hnua thil lo awmte hmu tûrin tuin nge rawn hruai kîr leh hlei ang?