Read Mizo_Old_version Thuhriltu 4 Bible Online

Thuhriltu 4 - Mizo_Old_version bible

Thuhriltu 4

¹Tin, ka han thlîr leh a, ni hnuaia inhnehchhiahna zawng zawngte chu ka hmu a; tin, en teh, hnehchhiaha awmte mittui te chu, thlamuantu an nei lo va; anmahni hnehchhiahtute chuan thiltihtheihna an nei a, anni zawngin thlamuantu rêng an nei lo.

²Chuvângin, mi nung la damte aiin mitthi thi tawhte chu awhawm ka ti zâwk;

³tin, anmahni ve ve ai pawhin lo la piang lo, ni hnuaia thiltih ṭha lo la hmu lo nih chu a ṭha zâwk.

⁴Tin, thawh rimna zawng zawng leh themthiamna tinrêngte hi ṭhenawm elrelna avânga lo awm a ni tih ka hre ta. Hei pawh hi engmahlo leh thil lothlâwn mai a ni.

⁵“Mi â chuan a kut a kuangkuah a, a inṭâm hlum ṭhîn,” tih a ni a.

⁶A dik thei e, hahdama vei khat neih pawh hi buai phîlîa thawka vei hnih neih ai chuan a ṭha.

⁷Tin, ka han thlîr leh a, ni hnuaiah chuan engmahlo a ni ka hmuh ni.

⁸Mi pakhat, mi mal tak a awm a, fapa emaw, unaupa emaw pawh a nei hek lo; mahse, tâwpintai awm lovin a thawk rim a, a hausaknate pawh a mit tlaina khawp a ni hek lo; mahni nawmsakna chân khawpa tu tâna thawk rim ka ni nge pawh a inti ngai hek lo. Hei pawh hi engmahlo mai a lo ni a, thil hrehawm tak a ni bawk.

⁹Pahnih chu pakhat ai chuan an ṭha zâwk, an thawh chhuah ṭhat avângin.

¹⁰An tlûk pawhin pakhat chuan a ṭhian chu a khai ding dâwn si a; mahni chauhva awm kha erawh chu a chung a pik e, a tlûk chuan khaidingtu tûr a nei si lo.

¹¹Chu lo pawh, pahnih chu an mut dun chuan an innghêng lum thei a, pakhat erawh chu amah maiin engtin nge a lum theih ang?

¹²Tin, amah maia awm kha chu miin hneh thei mah sela, pahnih chuan an lo dodâl zo dâwn a ni; hrui thum hrual chu a chat lawk lawk ngai lo ve.

¹³Lal putar â tawh, thurâwn dawngsawng duh lo ai chuan tleirâwl rethei leh fing chu a ṭha zâwk.

¹⁴Tân in ata chu lal tûrin a lo chhuak a ni si a; a ni, ama ram meuhvah pawh retheia piang ni mah sela.

¹⁵Ni hnuaia lêng mi nung zawng zawngte chu lal aiawh tûr tleirâwl lampangah vek ka hmu a.

¹⁶Lalin chhiar sên loh chungah ro a rêl thei e; mahse, a hnuah chuan tu mah a chungah an lâwm lo. Hei pawh hi engmahlo leh thil lothlâwn a lo ni ngei mai!