Read Mizo_Old_version Thuhriltu 6 Bible Online

Thuhriltu 6 - Mizo_Old_version bible

Thuhriltu 6

¹Thil ṭha lo, ni hnuaia ka hmuh chu, mihring tâna rit tak a ni:

²mi, Pathianin hausakna te, sum leh pai te, zahawmna te a pêk chu a rilruin a châk zawng zawng chu eng mah chham lovin a awm a; mahse, Pathianin chu mi chu chên tûrin theihna a pe lo va, mi dangin a chên ta zâwk a. Hei hi engmahlo mai a lo ni a, hrehawmna kulmût tak a ni.

³Miin fa za pawh hring sela, kum tam tak damin, a dam chhûng nite chu tam hle mah se, a dam laia thil ṭha chên lova, phûm pawh a hlawh si loh chuan, ani ai chuan thi saa pian pawh ṭha ka ti zâwk.

⁴Ani chu chhuak thlâwn mai a ni a, thimah a lût a, a hming chu thimin a chhilh bo ta a.

⁵Ni hmu lovin, eng mah a hre lo na a, mi dang ai khân a nihlawh zâwk a ni.

⁶A ni, kum sâng lêt hnih pawh dam sela, thil ṭha a hmuh si loh chuan thuhmun an ni mai lâwm ni?

⁷Mihring thawh rimna zawng zawng chu a hrawk tân a ni mai a; mahse, a châk a daih chuang lo.

⁸Mi fing chuan mi â aiin sâwtna eng nge a hmuh chuan bîk? A nih loh leh, mi rethei, mi nungdamte hmaa lên thiam chuan eng nge a hmuh?

⁹Châkna chavai mai mai ai chuan mita hmuh sa ngei chu a ṭha zâwk. Hei pawh hi engmahlo leh thil lothlâwn mai a lo ni.

¹⁰Thil lo awm apiang hi hming vuah tawh a ni a, mihring nihna pawh hi hriat sa a ni; amah aia ropui zâwk chu a dodâl thei lo.

¹¹Thu a tam poh leh engmahlo a tam mai a ni a, mihring tân eng nge a ṭhatna?

¹²Mi, a nun lothlâwn ni rei lo tê, hlimthla ral leh mai tûr anga a nun chhûng hian a tâna ṭha ber tûr chu tu nge hria ang? Ni hnuaiah hian mi, a hnua thil lo awm tûr chu tu nge hrilh thei ang?