Read Mizo_Old_version Thuhriltu 7 Bible Online

Thuhriltu 7 - Mizo_Old_version bible

Thuhriltu 7

¹A ṭha zawk e hming ṭha, hriak to aiin, Pian ni aiin thih ni.

²Lusûn ina kal a ṭha e, Ruaiṭheh ina kal ai chuan; Chu chu mi zawng zawng tâwpna a ni si; Nungdamin thinlungah an vei chu.

³A ṭha zâwk e lungngaih, nuihza aiin; Hmêla lungngaih lo lang zârah Thinlung a lo ṭha si.

⁴Mi fingte thinlung a châm reng lusûn inah, Mi âte thinlung erawh hlimhlawp inah.

⁵Mi fing zilhna ngaihthlâk a ṭha, Mi âte hla ngaihthlâk ai chuan.

⁶Bêl chhuan hnuaia hlîng alh ri ang Mi â nui ri chu a ni si. Hei pawh hi engmahlo mai a lo ni.

⁷Hnehchhiahna hian mi fing a tiâ a, Thamna hian rilru a tichhia.

⁸Thil tâwpna chu a ṭha zâwk ṭhîn, a ṭanna aiin, Rilrua chhel hi a ṭha zâwk, rilrua chapo aiin.

⁹I rilruah thinur hmanhmawh suh, Mi âte ṭânglaiah a châm ṭhîn, thinurna hi.

¹⁰Nang chuan zâwt suh, hmânlai nite ṭhat zâwkzia, tûnlai aiin; Hemi i zawh hi, fin vâng a ni si lo.

¹¹Finna a ṭha, ro luah tlukin, Ni hmutute tân lah hlâwkna a ni.

¹²Finna hi himna a ni si, Tangka sum himna a ni bawk; Hriatna ṭangkaizia erawh chu, A neitu nun chu finnain a tiharh ṭhîn.

¹³Pathian hnathawh hi ngaihtuah teh, A tihkawih tawh chu tu nge tingîl thei ang?

¹⁴Ṭhat niah chuan lâwm langin, Chhiat niah chuan ngaihtuah rawh: Pathian chuan pakhata pawh chu A dang ang bawka a siam a ni si a, Mihring chuan a hnu lam tûr a hriat chhuah loh nân.

¹⁵Ka nun engmahlovah hian engkim ka lo hmu ta a: mi fel a fel chunga borala awma, mi suaksual thil ṭha lo ti chunga dam rei phian si angte hi.

¹⁶Kherkhiap lutuk suh la, intifing lutuk hek suh; engah nge mahni i intihchhiat ang?

¹⁷Suaksual lutuk suh la, â hek suh; i hun lo takah engah nge i thih ang?

¹⁸Hei hi i chelh tlat a ṭha a, chu pawh chu thlah hlek suh; Pathian ṭihtu chuan a chhuahsan vek si ṭhîn a.

¹⁹Khawpuia rorêltu sâwm aiin finna chuan mi fing chu a tichak zâwk.

²⁰Thil ṭha titu, thil sual ti hauh lo khawpa mi fel chu lei chungah hian an awm lo takzet a ni.

²¹Mi thusawi nazawng chu bengkhawn suh, i chhiahhlawh ânchhe lawh che i hre dah ang e;

²²nang ngei pawhin mi dangte ânchhia i lawh ṭhîn tih i thinlung ngeiin a hre fo si a.

²³Hêng zawng zawng hi finnain ka chian tawh a ni. “Ka la fing ang chu,” ka ti ṭhîn a; mahse, a teuh lo mai.

²⁴Thil awmzia tak chu, hla tak, thûk tak, thûk êm êm a lo ni a, tuin nge hmuchhuak thei ang?

²⁵Finna leh thil awmzia hre tûr te, hmuchhuak tûr te, zawng tûr tein ka rilruin ka hawi vêl a, suahsualna hi âtna, âtna hi bâwrâwna a lo ni tih ka hria.

²⁶Tin, thihna aia kha zawk thil ka lo hriat chu, hmeichhia a thinlung, thang leh lên ang nia, a kuta a vawn lah kawl bun ang mai ni chu a ni; tu pawh Pathian tilâwmtu chu a lakah a him ang a, mi sual erawh chu a man ngei ang.

²⁷Thuhriltu chuan heti hian a ti: “Ngai teh, thu dik hre tûra ka han ngaihtuah khâwma ka hriat chhuah chu hei hi a ni, chu chu ka rilruin a zawn ṭhin, ka hmuh theih loh chu a ni a.

²⁸Mipa sângkhat zîngah chuan pakhat ka hmu thei a, hmeichhe zîngah phei chuan ka hmu lo.

²⁹Ngai teh, hei hi ka hriat chhuah tâk chu a ni: Pathianin tluang taka nung tûrin mihringte a siam a, anni erawh chuan an tikhirhkhân zo vek a ni,” tih hi.