Read Mizo_Old_version Thuhriltu 8 Bible Online

Thuhriltu 8 - Mizo_Old_version bible

Thuhriltu 8

¹Mi fing ang hi tu nge awm? Thil hrilhfiahna pawh tu nge hria? Finna chuan a hmêl a tiêng a, A hmêl pûm chhuak pawh a dang ta.

²Pathian hmaa i thutiam avâng chuan lal thupêk pawisa tûrin ka ti a che.

³A hma ata chhuah hmanhmawh suh la, thil ṭha lo tilui suh, a duh duha ti ṭhîn a ni si a.

⁴Lal thu chu thutâwp a nih avângin tu nge a hnênah, “Eng nge i tih ni?” ti thei ang?

⁵Thupêk pawm apiang chuan eng mah a tuar lo vang a, mi fing rilru chuan nîngkhâwng a hria a ni.

⁶Thil tinrêng hian nîngkhâwng a nei si ṭhîn a, mihring buaina chu a tân nasa hle mah se.

⁷Thil lo awm tûr chu a hre si lo va, a lo awm dân tûr chu tu nge hrilh thei ang le?

⁸Mi thlarau chelh theihna leh thih ni chunga thuneihna nei tu mah an awm lo; indo chhûngin chawlh a awm lo va, suahsualnain a neitute a chhanchhuak hek lo vang.

⁹Ni hnuaia thiltih zawng zawng kim takin ka ngaihtuah a, hei zawng hi ka chhinchhiah a ni: mi, mi dang chungah pawi khawpin a intilal ṭhîn a.

¹⁰Tin, mi suaksualte an phûm ka hmu ṭhîn a, thlânah an liam a; thil dik tite pawh hmun thianghlim ata an kal bo va, khawpuiah chuan hriat zui an ni lo. Hei pawh hi engmahlo mai a lo ni.

¹¹Thil sual tih chungah hremna hlen nghâl mai a nih ṭhin loh avângin, mihring fate thinlung chu thil sual ti tûrin a lo ngampa ṭhîn a ni.

¹²Mi sual chu vawi za pawh thil sual tiin dam rei bawk mah sela, a tluang lo vang; a ni tihsei ni mah sela, hlimthla ang lek a ni ang, Pathian ṭihna a neih loh avângin.

¹³Pathian ṭihtute erawh chu, amah ngei an ṭih avângin an tluang ang tih chiang takin ka hria.

¹⁴Lei chungah hian engmahlo a lo awm a lo awm a, mi felte chuan mi suaksualte tawn âwm tak an tawng a; mi suaksualte lahin mi felte tawn âwm tak an tawng lawi si a. Hei pawh hi engmahlo mai a lo ni ka ti a ni.

¹⁵Tichuan, ni hnuaiah hian ei leh in leh nuam taka awm aliama thil ṭha eng mah mihringin a neih loh avângin nawmna hi ṭha ka ti mai e; chu chu ni hnuaia a dam chhûng ni Pathianin a pêk zawng zawnga a thawh rimnaahte chuan a tel zêl dawn si a.

¹⁶Finna hre tûr leh lei chunga thiltih tâk zawng zawng hre tûra chhûn leh zân, mu lo chhîng lova ka rilru ka han hman chuan,

¹⁷Pathian thiltih zawng zawng, ni hnuaia tih tâkte chu miin a hmuchhuak thei lo tih ka hmu ta a. Miin zawng eng ang mah sela, a hmuchhuak lo vang; mi fingin hriat inring teh mah se, a hmuchhuak thei bawk hek lo vang.