Read Mizo_Old_version HLA THLAN KHAWMTE 1 Bible Online

HLA THLAN KHAWMTE 1 - Mizo_Old_version bible

HLA THLAN KHAWMTE 1

¹Hla thlan khâwmte, Solomona phuah chu.

²Min fâwp rawh se, a hmuia fawhnate chuan, Uain hnehin a ṭha si, i hmangaihna.

³I hriak hnawih mi chuan a nei, rim ṭha tak mai; Rimtui bun chhuah ang a ni e, i hming zawng; Chu vâng chuan an hmangaih che, nulaten.

⁴Min zai langin, i hniakhnung kan ûm ang che. Min hruai lût ta, lal chuan a pindan chhûngah. Nangma tâwnah kan hlimin kan lâwm ang a, Kan hril zêl ang, i hmangaihna, uain hnehin. An ngaina takzet che a ni e.

⁵Ka hâng na a, ka nalh a nia, Aw Jerusalem fanute u, Kedar puan inte leh Solomona puanzârte angin.

⁶Ka han deuh avângin mi iai suh u, Ni sâin min em vâng a ni e. Ka nu fapate ka chungah thinurin Grêp huan vêngah mi siam ta a, Mahni huan erawh ka vêng si lo.

⁷Min hrilh rawh, aw nang ka hmangaih chuan, I ran rual khawiah nge i châwma, Chhûn laia i chawlhtîr ṭhinna chu. Engah nge kei ka vah ka vah ang, I ṭhiante ran rual sîrah chuan?

⁸I hriat loh chuan, aw nang hmeichhia alaia mawi ber, Ran rual hniakhnungah chuan kal ta la, I kêltête châwm la, berâmpute puan in sîrah chuan.

⁹Ka khaikhin thîn che, aw ka hmangaih, Pharaoa tawlailîr sakawrlâ nên chuan.

¹⁰A nalh mang e, i biang, bahsam phiar mawi nên, I nghâwnga lunghlu hruite nên chuan.

¹¹Rangkachak ṭhi hrui kan siam ang che, Tangkaraw bel mawi neiin.

¹²Ṭhutna hmuna lalber awm laiin Ka nard rimtui chu a lêng chhuak e.

¹³Ka duh tak chu ka tân murra têl a ni, Ka ṭânglaia châm ang hi.

¹⁴Ka duh tak chu ka tân henna pâr bâwr ang, En-gedi grêp huana mi chu.

¹⁵Ngai teh, i mawi e, ka hmangaih, ngai teh, i mawi e; I mit ṭhuro ang mai a ni e.

¹⁶Ngai teh, i mawi e, ka duh tak, a ni, lungtiawi! Kan khum pawh a hring reng e.

¹⁷Kan in khanchhukte chu sidar thing, Kan inchhunte fâr thing lo ni e.