Read Mizo_Old_version HLA THLAN KHAWMTE 5 Bible Online

HLA THLAN KHAWMTE 5 - Mizo_Old_version bible

HLA THLAN KHAWMTE 5

¹Ka huanah chuan ka lo lût a, ka laina, ka ṭhiannu; Ka murra ka rimtuite nên ka lâwr khâwm a, Ka khawizu chu a thlâr chawpin ka ei a, Ka uain ka in a, hnutetui nên. Ei rawh u, aw ṭhiante u, in rawh u; A ni, in ṭeuh mai rawh u, aw ka duh takte u.

²Ka muhîl reng, ka thinlung erawh chu a harh, Chu, ka duh takin a rawn kik chu! “Min hawn rawh, ka laina, ka hmangaih, Ka ṭhuro, ka sawisêl bo, ka lu a huh zo si a, daiin, Ka sam chhâwllêng, zân dai farte chuan,” tiin.

³Ka kawr ka hlîp ta, engah nge ka hâk ang? Ka ke ka sil ta, engah nge ka tihbawlhhlawh ang?

⁴Ka duh tak chuan a rawn zen, kawngkhâr âwngah, Amah ka ngai êm e - lungrilah.

⁵Ka duh tak kawng hawn tûrin ka tho; Tin, ka kut chu a far a, murra-in, Murra a luang ka zungṭangahte, Kawng kalh hûmna chungah chuan.

⁶Ka duh tak tân chuan ka hawng ta a; Mahse, ka duh tak lâm ang lêt e. A ṭawng ka thlâin a tuar zo lo. Ka zawng ruai e, ka tawng si lo ve, Ka au chiam a, mi chhâng si lo va.

⁷Khawpui vênga kal hualtuten mi hmu a, Mi vua a, mi hliam ta a, Kulh vêngtuten an hlîp e, ka silhpuan.

⁸Ka ngên tlat che u, aw Jerusalem fanute u, Ka duh tak chu in hmuh chuanin Hmangaihnaah ka uai zo tih rawn hrilh r’u.

⁹Mi aiin i duh tak chu eng nge a nih bîk le, Aw hmeichhia alaia mawi ber? Mi aiin i duh tak chu eng nge a nih bîk, Chuti êma min ngen le?

¹⁰Ka duh tak chu a ṭha sen siar a, Sângsâwm zîngah a chungnung ber e.

¹¹A luin a iang e, rangkachak thianghlim, A sam kir chu dum zên e, lianâk iangin.

¹²A mitte chu luite tui kam ṭhuro ang, Hnutetuia inbuala fel taka ṭhu chu.

¹³A biangte chu hlo rimtui hmun, rimtui chhuah ṭhîn ang a ni. A hmuite chu lili pâr ang, murra tuiin a far e.

¹⁴A kutzungte rangkachak tlâwn, topaz lung phûm ṭhiau ang. A sakruang chu saingho, sapphir-a chei ang a ni.

¹⁵A ke châwn chu lung vâr tlâwn, rangkachak nghahchhana hûn ang. A lan dânin Lebanon tlângpui iang e, Sidar thing ṭha chungnung ang.

¹⁶A kam a thlum ber mai, a ni, a duhawm famkim. Hei hi ka duh tak chu a ni, hei hi ka ṭhian a ni, Aw Jerusalem fanute u!