Read Mizo_Old_version Isaia 1 Bible Online

Isaia 1 - Mizo_Old_version bible

Isaia 1

¹Amoza fapa Isaian Juda-ho lal Uzia te, Jothama te, Ahaza te, Hezekia te lal laia, Juda-ho leh Jerusalem chungchâng thua inlârna a hmuh chu.

²Aw vânte u, ngaithla ula; aw leilung, beng chhi rawh; LALPA chuan thu a sawi e: “Fanaute ka châwmin ka tiseilian a, ka chungah an hel ta si a.

³Bâwngpain a neitu a hria a, sabengtung pawhin a pu chaw pêkna a hre bawk a; Israel-ho erawh chuan an hre si lo va, ka mite chuan an ngaihtuah lo ve,” tiin.

⁴A, hnam sual, khawlohnaa khat, thil ṭha lo tih chîng, hnam nikhualo an ni. LALPA chu an kalsan a, Israel-ho Mi Thianghlima chu an hmusit a, intihrangin an hnungtawlh ta.

⁵Engati nge in hel zual deuh deuhva, vuaka in la awm cheu ni le? Lu chu a pumin a nâ a, thinlung pawh chu a pumin a chau ta.

⁶Kephah hnuai aṭanga lu thleng zakin dam lai rêng rêng a awm lo; pem te, vuak duk chur te, pân hnai la te hlîr a ni; chûng chu an hmet ping lo va, an tuam hek lo va, sahriak an hnawih hek lo.

⁷In ram chu a ṭiau zo va, in khuate chu meiin a kâng zo va; in ram chu ram dang miten in mit hmuhah an ei zo va, ram dang mite tihchhiat angin a chhe zo ta.

⁸Zion fanu chu grêp huana vênbûk ang leh, fanghma huana thlâm ang leh, khawpui hual vêl anga hnutchhiahin a awm ta.

⁹Sipaihote LALPA chuan tihboral bâng tlêm tê min lo zuahsak suh sela chuan, Sodom ang khân kan awm daih tawh ang a, Gomorra ang mai khân kan awm tawh ang.

¹⁰Sodom rorêltute u, LALPA thu hi hre rawh u; Gomorra mite u, kan Pathian dân thu-ah hian beng chhi rawh u.

¹¹LALPA chuan, “In inthawina zozai hi ka tân eng nge a ṭangkaina awm? Berâmpa hâlrala hlante leh ran châwm thaute thau chu ka hnê ta; bâwngpate leh berâmnote leh kêlpate thisenah pawh ka lâwm lo ve.

¹²Ka hmaa inlan tûra in lo kal hian, ka biak in hung chhûng kawtlai rah hi tuin nge phût che u ni?

¹³Thil pêk mai maite chu rawn keng tawh suh u; englo rimtui chu ka tân thil tenawm tak a ni. Thla thar te, Chawlhni te, inkhâwmpuia insâwm khâwm te mai mai chu ka ngaithei tawp lo mai; khawlohna a ni, inkhâwm ropui tak pawh hi.

¹⁴In thla tharte leh in hun bi nei kûtte chu ka rilru chuan a hua a ni; ka tân thil hnawksak tak a ni, tuar ka ning tawh e.

¹⁵Tichuan, in kut in phar hunah pawh in lakah ka mit ka hup tawh ang a; a ni, vawi tam tak in ṭawngṭai hunah pawh ka ngaithla tawh lo vang. In kutte chu thisenin a khat si a.

¹⁶Insil ula, intifai rawh u; ka mit hmuh phâk lohvah in thiltihte hi a sualna chu dah bo rawh u; sual tih hi bâng tawh ula,

¹⁷thil ṭha tih zir tawh rawh u; rorêlna fel zawng ula, hnehchhiahna tuarte chu ṭanpui ula; pa nei lote chu rorêlsak ula, hmeithaite chu sawipui rawh u,” a tih hi.

¹⁸ LALPA chuan, “Hawh teh u, i ngaihtuah tlâng teh ang u! In sualte chu senlâr angin awm tawh mah sela, vûr angin a vâr ang; senduk angin sen tawh mah sela, berâm hmul angin a awm ang.

¹⁹Tihnuam tak leh thu awih taka in awm chuan, in rama thil ṭhate hi in ei ang;

²⁰nimahsela, in duh lohva in hel chuan, khandaihin a ei zo vang che u,” a ti a; LALPA ka chuan chu chu a sawi tawh a ni.

²¹Engtizia nge khawpui rinawm tak chu nawhchizuarah a lo chan tâk le aw! Rorêl felnaa khatnu a nih ṭhin vei nên! Amahah chuan felna a awm ṭhîn a, tûnah erawh chuan tualthattute an awm tâk zâwk hi.

²²I tangkarua chu a êkchhiaah a lo chang ta a, i uain chu tui nên pawlh a ni ta.

²³I mi liante chu hel hmang, rûkrute ṭhian an ni a; mi tinin tham an duh a, lâwmman an ûm ṭhîn. Pa nei lote ro an rêlsak ṭhîn lo va, hmeithaite thu lah an hnênah a thleng ngai hek lo.

²⁴Chuvângin, Lalpa, Sipaihote LALPA, Israel-ho Mi Chaka chuan heti hian a sawi a: “A! Mi dotute hi ka tifikiang mai ang a, ka hmêlmate chungah phuba ka la ang.

²⁵I chungah ka kut ka thlâk leh ang a, i êkchhia chu fai takin ka tibo vang a, i suan zawng zawng chu ka la bo vek ang.

²⁶I chhûnga rorêltute chu a tîra an awm ang khân ka awmtîr leh ang a, i chhûnga remruattute chu a hmasa bera an awm ang khân ka awmtîr leh bawk ang. Chumi hnuah chuan ‘Felna Khawpui, Khawpui Rinawm Tak’ an la ti ang che.”

²⁷Zion chu rorêlna fela chhanchhuah a ni tawh ang a, a chhûnga mi hawi kîr lehte pawh felnaa chhanchhuah an ni ang.

²⁸Nimahsela, bawhchhetute leh mi sualte tihchhiatna chu a awm rual ang a, LALPA kalsantute pawh tihboralin an awm ang.

²⁹“In sasaw duh takte chu in zahpui tawhin, in huan thlante avâng chuan zak takin in awm dâwn a ni.

³⁰Sasua a hnah uai tawh leh huan tui hmu lo ang mai hi in ni dâwn si a.

³¹Tin, mi chak tak chu zîza ṭawm ang a ni tawh ang a, a hnathawh chu meisî ang a ni ang; tichuan, an kâng dûn ang a, tu mân an timit lo vang,” tiin.