Read Mizo_Old_version Isaia 10 Bible Online

Isaia 10 - Mizo_Old_version bible

Isaia 10

¹Dân chimawm tak siama, thupêk khirh tak ngaihtuah chhuaktute u, in chung a pik e!

²Hetiang hian mi khawngaihthlâkte dik takin in rêlsak duh lo va, retheite ṭhat vena tûr in dang tlat a, hmeithaite in ei a, fahrahte in rawk a.

³Tichuan, an kan niah che u leh hla tak aṭanga ṭiauna lo thleng tûrah chuan eng nge in tih tâk ang le? Ṭanpui dîlin tu hnênah nge in tlân tâk ang le? In ropuina chu khawiah nge in hnutchhiah tâk ang le?

⁴Salho hnuaiahte an kûn ang a, thahho hnuaiahte an tlu ang, chu chauh chu an chan a ni tawh ang. Chuti kauva a tih pawh chuan a thinur chu a la reh si lo va, a kut chu a la lek ta cheu va.

⁵Hawh Assuria mi, ka thinurna talhtum, ka lungnih lohna kengtu tiang!

⁶Râllâk la tûr leh, thil lâksak la tûr leh, kawtthlêr chirhdiak anga rap tûrin ani chu Pathian zah lo hnam do tûrin ka tîr ang a, ka thinurna mite bei tûrin thu ka pe ang.

⁷Nimahsela, ani chuan chutiang chu a tum a ni lo va, chutiang chu a rilru pawhin a ngaihtuah hek lo; hnam tam namênlova tam tihchhiat leh tihboral a ni a rilrûk zâwk ni.

⁸“Ka mi lian zawng zawngte hi lal vek an ni lâwm ni?

⁹Kalno khua chu Karkhemis khua ang mai a ni tawh lâwm ni? Hamath khua chu Arpad khua ang mai a ni tawh lâwm ni? Samari khua chu Damaska khua ang mai a ni tawh lâwm ni?

¹⁰Ka kut hian milemho ram, Jerusalem khua leh Samari khuaa mi aia milem siam chawp ṭha zâwk neitu pawh, a zawng chhuak ta si a,

¹¹Samari khua leh a milemte chunga ka tih ang khân, Jerusalem khua leh a milemte chungah pawh hian ka ti ve lo vang em ni?” a ti si a.

¹²Chumi avâng chuan heti hi a ni ang a, Lalpa chuan Zion tlâng leh Jerusalem khaw chunga a hnathawh tûr zawng zawng a thawh zawh hunah chuan, Assuria lal rilru uangthuang rah leh a mit chapo ropuina chu ka la hrem ang.

¹³Ani chuan, “Ka kut chaknain ka ti ta a ni, ka finna nên hian, ka bengvâr si a; chi tin ramrîte lah chu ka sawn a, an rote lah ka chhuhsak a, lalṭhutphaha ṭhute lah chu mi huai tak tih angin ka hnûk thla ta a.

¹⁴Ka kut hian chi tin hausaknate lah chu sava bu angin a zawng chhuak a; miin sava tui a pui rauhsan hnute an la angin leilung luah zawng zawng hi ka la vek ta a ni; thla zâp emaw, kâ âng emaw, hrâm emaw rêng rêng pawh an awm lo,” a ti vei si a.

¹⁵Hreipui hian thil cheh nâna hmangtu chu a uankhum dâwn em ni? Thingzaina hian a hrûttu chu a hnuaichhiah dâwn em ni? Talhtumin a lektute chu a lek vêl zâwk ang leh, tiangin thing ni si lo a lek zâwk ang mai hi a ni.

¹⁶Chuvângin, Lalpa, sipaihote LALPA chuan a mi thaute zîngah chuan chêrna a tîr ang a; a ropuina hnuaiah chuan mei alh lai mêk ang hian mei chhêmin a awm ang.

¹⁷Tin, Israel-ho Êntu chu mei atân a ni ang a, an Mi Thianghlima chu meialh atân a ni bawk ang; chu chuan ni khat thilah a hnimhlîngneite leh a buarte chu a tikângin a tiboral ang.

¹⁸A ramngaw leh a lei ṭha hmun ropuina pawh chu, thlarau leh taksa lamin a tiboral ang; tichuan, chhinchhiahna kengtu a chauh hun lai ang a ni ang.

¹⁹A ram ngawa thing la awm chhunte chu naupang ziak tham leka tlêm a ni tawh ang.

²⁰Tin, chumi niah chuan heti hi a ni ang a, Israel-ho la awm chhunte leh Jakoba chhûngte zînga a la damte chuan, anmahni thattu chu an ring leh tawh lo vang a; LALPA, Israel-ho Mi Thianghlima chu tihtakzetin an ring tawh zâwk ang.

²¹A la awm chhun, Jakob-ho la awm chhunte chu, Pathian chak tak hnênah chuan an la kîr leh ang.

²²I mi Israel-ho chu tuifinriat ṭiauvaivut zâtin awm mah sela, a la awm chhunte chauh chu an kîr leh dâwn si a; rorêlna dik takin a tihchhiat vek tûr an ni.

²³Lalpa, sipaihote LALPA chuan tâwpna, tâwpna thleng ngei tûra ruat tlat chu, lei chung zawng zawng lailiah chuan a la siam dâwn si a.

²⁴Chuvângin, Lalpa, sipaihote LALPA chuan heti hian a ti, “Aw ka mi, Zion-a awmte u, Aigupta rama an tih ang khân talhtuma vua che uin a tiang chu in chungah lek mah sela, Assuria mi chu hlau suh u.

²⁵Rei lo tê achinah chuan lungnih lohna chu hrîk thlâkin a awm tawh ang a, ka thinurna pawh anmahni tihboralnain hrîk thlâkin a awm tawh ang.

²⁶Oreb lungpuia Midian-ho an thah lai ang khân, sipaihote LALPA chuan amah bei tûrin vuakna chu a chawk tho vang a; a tiang chu tuifinriat chung lamah a awm ang a, Aigupta rama a lek ang khân a lek ang.

²⁷Chumi niah chuan heti hi a ni ang a, a ritphurh chu i koki ata lâk bovin a awm ang a, a nghâwngkawl chu i nghâwng ata lâk bovin a awm bawk ang, hriak thih avâng chuan nghâwngkawl chu tihchhiatin a awm tawh ang,” tiin.

²⁸Aiath khua a thleng ta, Migron khua a kal tlang ta; Mikmas khuaah a bungrua a dah ta.

²⁹Kâwnah an liam ta; Geba khuaah an riak ta. Rama khawho chu an khûr an khûr ta; Saula Gibea khawho chu an tlân bo ta.

³⁰Aw Galim khaw fanu, i awin ring takin au rawh! Aw Laisa khua, ngaithla rawh! Aw Anathoth, i va khawngaihthlâk êm!

³¹Madmena khawho tlân bovin an awm ta; Gebim khuaa awmte chu tlân bo tumin an inhâwr khâwm luai luai e.

³²Vawiin ngei hian Nob khuaah a châm dâwn; Zion fanu tlâng, Jerusalem mual pâwng chu, a kut a thin khum e.

³³Ngai teh, Lalpa, sipaihote LALPA chuan thil râpthlâk takin a zârte chu a sât thla ang a; sâng tak takte chu kihin a awm ang a, a lawr bîkte pawh chu râwt hniamin a awm ang.

³⁴Thîrin ramhnuai thing bit takte chu a kit ang a, Lebanon sidar thingte chu mi ropui kihin a tlu dur dur ang.