Read Mizo_Old_version Isaia 11 Bible Online

Isaia 11 - Mizo_Old_version bible

Isaia 11

¹Jesaia bul aṭangin chawrno a lo chhuak ang a, a zung aṭangtea puak chhuak chu a rah ang.

²LALPA thlarau - finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu - a chungah a fu ang.

³A lâwmna chu LALPA ṭihnaah a ni ang, a mita a hmuh angin ro a rêl lo vang a, a benga a hriat angin a zilhhau hek lo vang;

⁴retheite chu fel takin ro a rêlsak zâwk ang a, leia mi thuhnuairawlhte tân chuan thlei bîk nei lovin a zilhhausak bawk ang; a ka talhtumin lei hi a vua ang a, a hmuia thawin mi suaksualte chu a that ang.

⁵Felna hi a taihrên a ni ang a, rinawmna hi a kawnghrên a ni ang.

⁶Chinghnia chu berâmno nên an awm dûn tawh ang a, keitê chu kêlno nên an bawk dûn tawh ang; bâwngno leh sakeibaknei vânglai leh ran châwm thaute chu an awm ho tawh ang a; naupang têin a hruai duah duah ang.

⁷Sebâwng leh savawm an tla ang a; an notête chu an bawk za dial dial tawh ang; tin, sakeibaknei chuan bâwngpa angin buhpâwl a ei tawh ang.

⁸Nau hnute hne lai chu rûlrial kaw kotlângah a tualchai ang a, nau hnute hnêk bâng tawh chuan rûlmuk tawmkûk kotlângah a kut a nghat ang.

⁹Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang, tuite hian tuifinriat a khuh reng angin, leilung hi LALPA hriatnain a khat zo vek dâwn a ni.

¹⁰Tin, chumi niah chuan heti hi a ni ang a, Jesaia zung, mi tin chhinchhiahna atâna ding chu, amah ngei chu hnam tinin an râwn ang a; a chawlhna hmun chu a ropui ang.

¹¹Chumi niah chuan heti hi a ni ang a, Lalpa chuan a miteho thi bâng la awm chhun, Assuria ram ata te, Aigupta ram ata te, Pathros ram ata te, Kus ram ata te, Elam ram ata te, Sinar ram ata te, Hamath khua ata te, tuifinriat thliarkâr atate la leh tûrin a vawi hnihnaah chuan a kut a la phar leh ang.

¹²Tin, hnam tin tân chhinchhiahna a târ chhuak ang a, Israel hnawh chhuahhote chu a hruai khâwm ang a, Juda darhhote chu kâwlkil li ata a hruai khâwm ang.

¹³Tichuan, Ephraim-ho îtsîkna chu a bo tawh ang a, Juda-ho tibuaitute chu tihboralin an awm tawh ang; Ephraim-hovin Juda-ho an îtsîk tawh lo vang a, Juda-ho pawhin Ephraim-ho chu an tibuai tawh lo vang.

¹⁴Tichuan, anniho chu thlang lamah Philistia-ho kokîah chuan zuk thlâwkin an zuk fu ang a; khawchhak fate chu an rawk za ang; Edom leh Moab-ho chungah chuan an kut an thlâk ang a; Amona thlahte chuan an thu an awih tawh ang.

¹⁵Tin, LALPA chuan Aigupta tuifinriat tengsâwl chu a tichhe vek ang a; Luipui pawh chu a thli lum huam huam chuan a kut a thin khum ang a, luitê pasariha siam khawpin a vua ang a, mite chu kephah pawh huh lovin a kal kaitîr ang.

¹⁶Tichuan, Aigupta ram ata an chhoh nia Israel-ho tâna lamlian a lo awm ang khân, a miteho thi bâng la awm chhunte tân chuan Assuria ram aṭangin lamlian a lo awm ang.