Read Mizo_Old_version Isaia 12 Bible Online

Isaia 12 - Mizo_Old_version bible

Isaia 12

¹Chumi niah chuan heti hian i la sawi ang, “Aw LALPA, lâwm thu ka hrilh ang che; ka chungah lo thinur ta mah la, i thinur chu a reh ta a, nangin mi thlamuan ta a nih hi.

²Ngai teh, Pathian chu mi chhandamtu a ni a, ka ring ang a, hlauvin ka awm lo vang; ‘LALPA JEHOVA chu ka chakna leh ka hla a ni si a; mi chhandamtu a lo ni ta bawk a,’ ” tiin.

³Chuvângin, chhandamna tuikhur ata te chu hlim takin tui in la chawi ang.

⁴Tin, chumi niah chuan heti hian in la sawi ang, “LALPA hnênah chuan lâwm thu hril ula, a hming lam ula, a thiltihte chu mi tin zîngah hriattîr ula, a hming chu chawimawiin a awm tih sawi rawh u.

⁵LALPA chawimawiin hla sa rawh u, ani chuan thil ṭha berte chu a lo ti tawh si a; chu chu leilung luah zawng zawngah hian hriatin awm rawh se.

⁶Zion-a awmte u, ring takin au ula, au tuar tuar rawh u, Israel-ho Mi Thianghlima in zînga awm chu a ropui si a,” tiin.