Read Mizo_Old_version Isaia 13 Bible Online

Isaia 13 - Mizo_Old_version bible

Isaia 13

¹Babulon khaw phur rit, Amoza fapa Isaian a hmuh chu:

²Mi lianho kawngkâahte chuan an luh theihna tûrin, tlâng kawlh vulah chuan chhinchhiahna târ chhuak ula, ring takin anni chu au ula, kutin zaizir rawh u.

³Keimah ngeiin ka mi ruatho chu thu ka pe ta, a ni, ka mi chak tak, ka mi induh taka hlimte chu, ka thinur hrithlatu atân ka ko ta.

⁴Chu! Tlânga mipui au thâwm, mipui tam tak thâwm ang mai chu! Chu! Hnam tin rama mi awm khâwmho sa mur mur thâwm chu! Sipaihote LALPA chuan râl bei tûrin sipaiho a pun hlawm a nih chu.

⁵Anniho, LALPA leh a lungnih lohna hriamhreite chu, ram hla tak ata, kâwlkil tâwp rêt aṭangin, ram zawng zawng hi tichhe tûrin an lo kal a ni.

⁶Chiau vak vak rawh u, LALPA ni chu a hnai tawh si a; Engkimtitheia aṭangin chhiatna a lo thleng dâwn e.

⁷Chuvângin, kut zawng zawng a chak lo vang a, mihring thinlung tinrêng pawh a tui ral ang a,

⁸an hlau vang. Natna leh lungnih lohnate chuan a man hlawm ang a; hmeichhe nau vei ang maiin an nâ ang; mak intitawnin an awm hlawm ang; an hmêlte chu meialh hmêl ang mai a ni ang.

⁹Ngai teh, ram tiṭiau tûr leh chuta mi sualte chu a chhûng ata tiboral tûrin, LALPA ni chu nasa takin, thinrimna leh thinurna nasa tak nên a lo thleng dâwn e.

¹⁰Vân arsite leh a chhohreivûngte chuan an êng an chhuah lo vang a; ni chu a chhuah laia tihthimin a awm ang a, thla pawhin a êng chu a êntîr dâwn tawh lo a ni.

¹¹Tin, khawvêl hi an sualna avângin ka hrem ang a, mi suaksualte chu an khawlohna avângin ka hrem bawk ang; tin, mi chapo ṭawng chaltlai chu ka tireh ang a, mi hlauhawm chapona chu ka tihniam bawk ang.

¹²Mi hi rangkachak thianghlim ai pawha vâng zâwkin ka siam ang a, mihring ngei hi Ophir rangkachak thianghlim ai pawha vâng zâwkin ka siam ang.

¹³Chutichuan, vân khi ka tikhûr ang a, sipaihote LALPA thinrim avângin, a thinurna nasa tak niah chuan, lei pawh hi a awmna hmun sawn dâwrh khawpa tihnghînin a awm ang.

¹⁴Tin, heti hi a ni ang a, sakhi ûm nek ang leh berâm tu ma khalh khâwm loh angin, mi tinin mahni chipuite lam ṭheuh an hawi ang a, mi tin mahni ram lamah ṭheuh an tlân bo vang.

¹⁵Tu pawh an hmuh apiang chhun tlangin an awm ang a, tu pawh an man apiang khandaiha tihthlûkin an awm ang.

¹⁶An nausênte pawh an mit hmuhah sawm dep khawpa lei vuak nâna hmanin an awm ang a; an inte chu rawkin a awm ang a, an nupuite chu pâwngsual tâwkin an awm bawk ang.

¹⁷Ngai teh, Media-ho anmahni bei tûrin ka chawk tho vang a, chûngho chuan tangkarua an ngaihsak lo vang a, rangkachakah pawh an lâwm lo vang.

¹⁸An thal ngulte chuan tlangvâlte chu a tisawm ang a, mi rîla rah khawngaihna rêng rêng an nei lo vang a; an mit chuan naupangte a zuah lo vang.

¹⁹Tin, Babulon, ram tin ropuina, Kaldai-ho chhuan thil mawi tak chu, Pathianin Sodom leh Gomorra a tihboral lai ang khân a la awm ang.

²⁰Eng tikah mah chutah chuan mi an awm tawh lo vang a, chhuan awm chhûng zawng zawng chuan a chhûngah awm an awm hek lo vang; Arab miten chutah chuan an puan in an zâr lo vang a, berâm vêngtuten chutah chuan an berâm rualte an bawhtîr hek lo vang.

²¹Thlalêra ramsate chutah chuan an bawk ang a, an inte chu thil nung ngui taktein a khat ang a; sava nghâwngseite chutah chuan an chêng ang a, sathârte chutah chuan an tualchai tawh zâwk ang.

²²Tin, chinghniate chu an kulhbîngah chuan an hrâm ang a, sihalte pawh an lal in nuam tak takahte chuan an hrâm bawk ang. A hrem hun tûr chu a thleng dâwn tawh a, a nite pawh tihseiin a awm lo vang.