Read Mizo_Old_version Isaia 14 Bible Online

Isaia 14 - Mizo_Old_version bible

Isaia 14

¹ LALPA chuan Jakob-ho a khawngaih ang a, Israel-ho chu thlangin anmahni ram ngeiah a la awmtîr dâwn si a. Ram dang mite chuan anmahni an zawm ang a, Jakoba chhûngte chu an vuan tlat ang.

²Tin, mi tin chuan anmahni an hruai ang a, an hmun tûr chu an thlen ang a, Israela chhûngte chuan LALPA ramah chuan anni chu bawihpaahte leh bawihnuahte an la nei ang a; anmahni sala neitute chu salah an la man ang a, anmahni tiduhdahtute chungah chuan ro an la rêl ang.

³Tin, i lungngaihna ata te, i buaina ata te, hnathawh hautak zet an thawhtîrna che ata te LALPAN a chawlhtîr che niah chuan heti hi a ni ang a,

⁴he tihelna thu hi Babulon lal au khumin i la sawi ang: “Engtizia nge hnehchhiahtu chu a va reh ta êm! Engtizia nge rangkachak khawpui chu a va reh ta êm!

⁵LALPA chuan mi suaksual tiang a titliak ta, rorêltute lal tiang chu;

⁶mi dang chunga râwngrâ taka inleka, an tlâwm tawhte tihduhdah bâng ngai lote.

⁷Leilung pum pui hi a châwl a, a reh rawih rawih a; hla an sa chhuak phut a.

⁸A ni, i chung thu avângin fârte chu an hlim a, Lebanon tlânga sidar thingte nên, ‘Tihtlâwma i awm achin chu kit thlutu tûr rêng rêng kan hnênah an lo chho ngai ta lo,’ tiin.

⁹Hnuai lam ata Seol chu i lo thleng hmuak tûr chein, nangmah avângin a buai mur mur a ni; mitthi, leia puipa zawng zawng chu nangmah avângin a chawk tho va; hnam tin lal zawng zawng chu an lalṭhutphah ata a kai tho ta.

¹⁰Chûng zawng zawng chuan nangmah biain, i hnênah heti hian an sawi ang: ‘Nang pawh keimahni angin i chak lo ve ta elo? Keimahni awm angin i awm ta elo?

¹¹I ropui bûng bûngna chu Seol-a hruai thlâk a ni ta, i perhkhuang ri bur burte nên; changpât chu i hnuaiah an phah a, englo lungte chuan an khuh ta che a nih hi,’ tiin.

¹²“Aw vârparh, zîng lam fapa, engtizia nge vân ata i tlâk tâk chu le! Hnam tin titlâwmtu, engtizia nge leia sah thlâka i awm tâk chu le!

¹³I rilruah chuan, ‘Vânah ka chho vang a, Pathian arsite chung lamah khian ka lalṭhutphah ka chawisâng ang; inkhâwmna tlâng, hmâr tâwp rêta awmah chuan ka ṭhu ang a;

¹⁴chhûm aia sâng zâwkahte khian ka chho vang a, Chungnungbera ang maiin ka awm ang,’ i tih ṭhin vei nên khân.

¹⁵Nimahsela, Seol-ah, khuarkhurum tâwp rêtahte chuan hruai thlâkin i awm dâwn si.

¹⁶A hmu che apiangin an en ngun ang chia, ‘He mi hi maw lei tikhûra, ram tin tinghînga,

¹⁷khawvêl thlalêr anga siama, a khaw awmte tiborala, a salte an in lama kal tûra chhuah ngai lova chu?’ tiin i chanchin an la chhût ang.

¹⁸Hnam tin lal zawng zawng, an zain, mahni in ṭheuhvah ropui takin an muhîl a.

¹⁹Nang erawh chu a zung puak chhuak tenawm tak leh, râl thah, khandaiha chhun tlang, khuarkhuruma lungte zînga chhukho silhfên angin i thlân in aṭanga hla takah paih chhuahin i awm tâk zâwk hi, ruang rah beh ang maiin.

²⁰I ram i tihchhiata, i khua leh i tuite i thah avângin an zîngah phûmin i awm ve lo vang; thil ṭha lo titute thlahte hming chu kumkhuain an lam lo vang.

²¹An thawha, leilung an neiha, lei chung hi khuaa an tihkhah loh nân, an pute sualna avângin a fate thah zai rêl rawh u,” tiin.

²²Tin, “Anmahni bei tûrin ka tho vang,” sipaihote LALPAN a ti, “Babulon aṭanga hming leh a la awm chhunte leh, fapa leh fapaa fapa chu ka tiboral ang,” LALPAN a ti.

²³“Sakuh tân rovah ka siam bawk ang a, dîlahte pawh ka siam ang; tihboralna hmunphiahin ka phiat bawk ang,” sipaihote LALPAN a ti.

²⁴Sipaihote LALPA chuan hetianga sawiin chhia a chham ta, “Matheilovin ka ngaihtuah ang tak hian a lo thleng ang a, ka ruat ang tak hian a awm bawk ang:

²⁵ka ramah chuan Assuria mi chu ka tichhia ang a, ka tlângahte chuan ka chîl nek ang, tih ang hian. Chumi hunah chuan a nghâwngkawl bahtîr chu anmahni aṭang chuan a bo tawh ang a, an rit phurhtîr chu anmahni kokî aṭang chuan a bo tawh bawk ang.

²⁶Chu chu a ni, lei chung zawng zawnga thuruat chu ni, chu bawk chu a ni, hnam tinrêng chunga kut phar chu ni.

²⁷Sipaihote LALPA chuan a ruat tawh si a, tuin nge sûtsak ang? A kut chu pharin a awm tawh a, tuin nge lâk kîrtîr ang?” tiin.

²⁸Lal Ahaza thih kumah khân he phurrit hi a lo awm ta.

²⁹Aw, Philistia ram pum pui, nangmah vuakna tiang a tliah tâk avângin lâwm suh; rûl zung aṭang chuan rûlmuk a chhuak dâwn si a, a rah chu rûl alh thlâwk thei a la ni ang.

³⁰Mi rethei fa tîrte chu an tla dial dial tawh ang a, mi, pachhiate chu him takin an bawk tawh ang; nanga zung erawh chu ṭâmin ka tithi ang a, i ta la awm chhunte chu thahin an awm ang.

³¹Aw kawngkhâr, chiau vak vak rawh; aw khawpui, au rawh; aw Philistia, i pumin i tui ral zo ta; hmâr lam aṭangin meikhu a lo chhuak si a, an hun ruatahte chuan hnufual rêng an awm ngai lo a ni.

³²Philistia hnam palaite chu engtin nge kan chhân ang le? “LALPAN Zion chu a din a, a mite zînga retheite chu amahah an tlu lût ang,” tiin a ni ang chu.