Read Mizo_Old_version Isaia 15 Bible Online

Isaia 15 - Mizo_Old_version bible

Isaia 15

¹Moab ram phurrit chu. Zan khatah Moab rama Ar khua chu tihchhiatin a awm a, engmahlova siamin a awm ta si a; zan khatah Moab rama Kir khua chu tihchhiatin a awm a, engmahlova siamin a awm ta si a.

²Bajith-ah leh Dibon-ah, hmun sângahte chuan ṭap tûrin a chho ta a. Moab-ho chuan Nebo leh Medeba chu an ṭah khum vak vak a; an lu zawng zawng a kawlh vek a, khabe hmul tinrêng pawh mehin a awm ta vek a.

³An kawtthlêrahte chuan saiip puan an veng a; an in chungahte leh an mual zau laiahte chuan mi tin chu nasa taka ṭapin an chiau vak vak a.

⁴Tin, Hesbon-ho pawh an au va, Eleale-ho nên an aw chu Jahaz khua lam pawhin an lo hria a; chuvângin, Moab-ho râlthuama inthuamte chu ring takin an au va; an nunna chu an kawchhûngah chuan a khûr a.

⁵Moab-ho avângin ka thinlung chu a au va; an mi ṭhate chu Zoar khuaah leh Eglath-selisija-ah an tlân a. Luhith chhovah chuan ṭap chungin an kal chho a ni; Horonaim kawngah chuan chhiatna auvin an au chhuak a ni.

⁶Nimrim tuite chu a kang ang a, hlobet chu a vuai zo dawn si a; hlobet chawrno chu a râwp a, thil hring rêng rêng a awm ta si lo.

⁷Chuvângin, an sum la neih chhunte leh an dah ṭhatte chu tuipuisuthlah Lui râlah chuan an kal bopui ang.

⁸Au thâwm chu Moab ramri vêlahte chuan a thang si a; a chiau vak vak thâwm chu Eglaim khaw lamah a thang a, a chiau vak vak thâwm chu Beer-elim khaw lamah a thang a ni.

⁹Dimon tuite chu thisenin a bual zo vek si a; Dimon chungah chuan thil nasa lehzual ka thlentîr dâwn si a, Moab-ho zînga tlân chhuakte leh, chu rama la awm chhunte hnênah chuan sakeibaknei ka tîr ang.