Read Mizo_Old_version Isaia 16 Bible Online

Isaia 16 - Mizo_Old_version bible

Isaia 16

¹Ram rorêltu tân berâmnote chu Sela khua thlalêr lama awm aṭang chuan, Zion fanu tlângah chuan thawn rawh u.

²Tichuan, Moab fanute chu sava, a bu ata rau darh thlâwk thlâwkte angin, Arnon lui kaiahte an awm dâwn nia.

³Rem min ruatsak la, ro min rêlsak rawh; i hlim chu chhûnlaiah zân angin siam la; hnawh chhuahte chu bihrûktîr rawh, tlân bo chu mantîr suh.

⁴Moab zînga mi hnawh chhuaha awmte chu i hnênah awm rawh se; an tân tichhetu hmêl lakah chuan bihrûkna hmun ni rawh. Hlêprutu chu engmahlova siamin a awm ta si a, tihchhiatna a reh ta a, hnehchhiahtute chu ram aṭang hian tihboralin an awm ta.

⁵Tichuan, lalṭhutphah chu khawngaihnaa tihnghehin a awm ang a; chumi chungah, Davida puan inah chuan mi pakhat, rorêlin, rorêlna fel zawngin, thil fel rang taka ti nghâlin tihtakzetin a ṭhu ang.

⁶Moab-ho chapona thu, an chapo êm êm a ni tih kan lo hria a; an ṭawng chaltlaizia leh, an chapozia leh, an thinurzia thu chu; an uannate chu eng mah a ni lo.

⁷Chuvângin, Moab-ho chu Moab-ho chungah an chiau vak vak ang a, mi tin an chiau vak vak ang. Kir-hareseth grêp rêp hlâwm chu lungchhe vânkaiin in la ṭah chhan ang.

⁸Hesbon lote chu a chul zo ta si a, Sibma grêp hrui nên; hnam tin lalte chuan a kûng ṭha mite chu an titliak pheng phung a, Jazer khaw thleng thlengin a zâm hlawm a, thlalêrah a zâm lût a; a pêngte chu a zâm darh sung a, tuipui chu a zâm kai ta a.

⁹Chuvângin, Sibma grêp hrui chu Jazer ṭahin ka ṭah ang a; aw Hesbon leh Eleale, ka mittuiin ka leih ang che; i nipui rahte chungah leh i buh seng chungah chuan inbei au thâwm chu a tla ta si a.

¹⁰Lâwmna chu lâksakin a awm ta, lo ṭha tak aṭangte chuan hlimna chu lâksakin a awm ta bawk a; grêp huanahte chuan hla sak rêng rêng a awm tawh lo vang a, thâwm hlimawm rêng rêng a awm tawh hek lo vang; grêp sâwrna khurahte chuan rap sâwrtu rêng rêngin uain an rap chhuak tawh lo vang; grêp seng au chu ka tireh ta.

¹¹Chuvângin, ka rîlte hi Moab khawngaih avângin ṭingṭang angin a ri a, ka kawchhûng chu Kir-heres khawngaih avângin ṭingṭang angin a ri bawk a.

¹²Tin, heti hi a ni ang a, Moab chu a inlan hunah, hmun sângah intihaha, ṭawngṭai tûra a hmun thianghlima a lo kal hunah chuan a hlawhtling lo vang.

¹³Chûng chu Moab chungchâng thu LALPAN tûn hma lama a sawi kha a ni.

¹⁴Tûnah erawh chuan LALPAN, “Inhlawhfa kum chhiara kum thum chhûngin Moab ropuina chu, a mipui tam takte chawpin, hmuhsitawma awmtîrin a awm ang a; a la awm chhunte chu tlêm tê takmeuh, sawi tham loh an ni ang,” tiin a sawi ta.