Read Mizo_Old_version Isaia 17 Bible Online

Isaia 17 - Mizo_Old_version bible

Isaia 17

¹Damaska khaw phurrit chu. “Ngai teh, Damaska chu khawpui ni tawh lo tûrin lâk bo a ni ta; tichuan, in chim khâwm mai a ni tawh ang.

²Aroer khuate chu tlânsanin a awm ta; berâm rualte awmna tûr a ni mai ang, chûng chu an bawk ang a, tu mân an tihlau lo vang.

³Ephraim lakah kulhpui chu a bo vang a, Damaska lakah ram chu a bo vang, Suria rama la awm chhunte pawh an bo vang, Israela thlahte ropuina ang lekin an awm ang,” sipaihote LALPAN a ti a.

⁴“Chumi niah chuan heti hi a ni ang a, Jakoba ropuina chu tihchêrin a awm ang a, a tisa thauna chu a lo chêr tawh ang.

⁵Tichuan, buh sengtupan buh a lâka, a vuite chu kuta a hlep ang mai hi a ni ang a; a ni, Rephaim ruamah miin buh vui hmaihte chu an chhar ang mai hi a ni ang.

⁶“Nimahsela, olive thing vuak hnua a ziding sâng ber chhîpah rah pahnih pathum emaw, thing rah tak zâr sei berah te pali panga emaw a awm ṭhîn ang hian, chutah chuan hmaih chhar tûr a la awm ang,” LALPA, Israel-ho Pathian chuan a ti a.

⁷Chumi niah chuan miin an Siamtu lam an en tawh ang a, an mitte chuan Israel-ho Mi Thianghlima chu a thlîr tawh ang.

⁸Maichâm, anmahni kutchhuak lamte chu, an en tawh lo vang a, anmahni kuta siam, Aseri-te emaw, ni lemte emaw an zah tawh hek lo vang.

⁹Chumi niah chuan an khaw nghet takte chu ngawbing leh tlâng chhîpa hmun tlânsan hnu, Israela thlahte hmaa an tlânsan hnu ang kha a ni ang; tichuan, hmun tihṭiau a ni tawh ang.

¹⁰Pathian, i chhandamtu i theihnghilh a, i chakna lungpui chu i hre reng si lo; chuvângin, kûng mawi tak takte i phun ṭhîn a, a chhûngah chuan ṭang danglamte i vit bûr fur ṭhîn a;

¹¹i phun niin i ping vêl ṭhîn a, zîngah chuan i thil chi chu i tipâr ṭhîn; nimahsela, rah lawh chu lungngaihna leh natna nasa tak niah chuan a bo ṭhîn.

¹²A, mipui tam tak ri dur dur, tuifinriat ri dur dur anga ri dur durte leh, hnam tin ri hum hum, tui nasa tak ri hum hum anga ri hum humte chu aw!

¹³Hnam tin chu tui tam tak ri hum hum angin an ri hum hum ang: nimahsela, ani chuan a zilhhau vang a; tichuan, hla takah an tlân bo vang a, tlânga buhsi thli len ang leh vaivut thlipui len vir mup mup angin ûmin an awm ang.

¹⁴Tlai lamah chuan, ngai teh, thil râpthlâk tak a awm a; tin, khawvâr hmain an awm ta lo. Chu chu râllâka min lâksaktute chan a ni a, min rûksaktute pual a ni bawk a.