Read Mizo_Old_version Isaia 18 Bible Online

Isaia 18 - Mizo_Old_version bible

Isaia 18

¹A, thla zâp ri hum hum ram, Ethiopia rama luite râla awm,

²tuipuiah, tui chunga luang lawngahte palaiho tîrtu chu! Zualko chak takte u, hnam sâng thlerh thlawrh, mâm tak hnênah, an chhuah ṭan achin tûn thlenga mi hlauhawm takte hnênah chuan kal rawh u; chu hnam chuan ram an sem ṭhîn a, an rap thlu bawk ṭhîn, an ram chu luite chuan a sem darh a ni.

³Khawvêla awm zawng zawng leh leilung luahte u, tlângahte chhinchhiahna an târ chhuah hunah en rawh u; tawtawrâwt an ham hunah ngaithla rawh u.

⁴LALPAN ka hnênah heti hian a sawi a ni: “Ka awm hle hle ang a, ka awmnaah hian ka thlîr reng ang; ni sat laia khaw lum thiang vel vul ang leh buh seng khaw lum laia daifîm chhûm ang hian,” tiin.

⁵Grêp lawh hun hmaa a pâr a rêma, a pâr chu grêp puama a lo chan hunah chuan, a pêng tê tê chu theikûng ah chhumna chemtein a ât chhum dâwn si a, a pêng zâm darhte chu a la bovin a sât chhum bawk ang.

⁶Chûng chu tlânga sava kohamte tân leh, leia sate tân chuan hnutchhiahin an awm hlawm ang; tichuan, sava kohamte chuan anni chu nipui chhûngin an ei ang a, leia sa zawng zawng chuan thlasik chhûngin an ei ang.

⁷Chumi hunah chuan, sipaihote LALPA hming awmna hmun, Zion tlângah chuan, sipaihote LALPA hnêna pêk atân mi sâng thlerh thlawrh, mâm takte hnên ata, an chhuah ṭan achin tûn thlenga mi hlauhawm takte hnên ata chu, lâwmman an rawn sin ang; chu hnam chuan ram an sem ṭhîn a, an rap thlu bawk ṭhîn, an ram chu luite chuan a sem darh a ni.