Read Mizo_Old_version Isaia 19 Bible Online

Isaia 19 - Mizo_Old_version bible

Isaia 19

¹Aigupta ram phurrit chu. Ngai teh, LALPA chu chhûm chak tak chunga chuangin Aigupta ram a lo thleng ta e; Aigupta ram milemte chu a hmaah chuan an khûr zawih zawih ang a, Aigupta-ho thinlung chu an kawchhûngah a tui ral mai ang.

²“Tin, Aigupta mite chu Aigupta mite vêk bei tûrin ka chawk tho vang; tichuan, mi tinin mahni unau beiin, mi tinin mahni ṭhenawm beiin, an inkâp ang; khua leh khua an inbei ang a, ram leh ram an inbei ang.

³Tichuan, Aigupta-ho thlarau chu an kawchhûngah chuan engmahlova siamin a awm ang a; an remruat chu ka tichhia ang; tichuan, milemte leh, aikaihthiamte leh, ramhuai aienthiam zâwlte leh, dawithiamte chu an râwn ang.

⁴Tin, Aigupta mite chu hotu nunchhe tak kutah ka hlân ang a; tichuan, lal kawlh takin an chungah ro a rêl tawh ang,” Lalpa, sipaihote LALPA chuan a ti.

⁵Tin, tuipui tuite chu a kang ang a, lui chu a luang bovin a lo kangchat tawh ang.

⁶Luite chu a rimchhia ang a; Aigupta ram tui luangte chu a kâm telh telh ang a, a kangchat mai ang; phairuangte leh tui hnimte chu a vuai zo vang.

⁷Nile lui kianga, Nile lui kam ngeia ran tlatna phûlte leh, Nile lui kianga thil chîn zawng zawngte chu a lo ro vang a, len bovin a awm ang a, a awm tawh lo vang.

⁸Sangha mantute pawh chu an ṭap ang a, Nile luia nghakuai khai ṭhîn zawng zawngte chuan âwm an inchûm ang a, tuia lênkhang zâr ṭhînte chu an chau tawh ang.

⁹Chu lo pawh chu zîza zai sîn dek mite leh puan ngo tah mite chu an mualpho vang.

¹⁰Tin, a lung bante chu tihsawmin a awm ang a, inhlawhfa ṭhîn zawng zawngte chu an rilruin an lungngai ang.

¹¹Zoan khuaa mi liante chu an â ngawt mai; Pharaoa remruattu fing berte remruat chu sa remruat ang mai a lo ni ta; Pharaoa hnênah, “Mi fing fapa, hmasâng lalho fapa ka ni,” engtiziaa ti ṭhîn nge in nih?

¹²Khawiah nge i mi fingte chu le? Anni chuan hrilh nghâl che rawh se; Aigupta ram chunga thil thleng tûr, sipaihote LALPA ruatte chu hre rawh se.

¹³Zoan khuaa mi liante chu mi â an lo ni ta a, Noph khuaa mi liante chu bumin an awm ta; Aigupta hnamho kila lungte chuan Aigupta-ho chu an vah botîr ta.

¹⁴LALPA chuan Aigupta-ho zîngah luhlulna thlarau a awmtîr ta; tichuan, zu rui mi chu a luakah a pai thlawk thlawk ang hian, Aigupta-ho chu an hnathawh tinrêngah a kal kawitîr ta.

¹⁵Aigupta-ho tân luiin emaw, meiin emaw, tûm kauvin emaw, phûngladinin emaw thawhsak theih a awm tawh hek lo vang.

¹⁶Chumi niah chuan Aigupta-ho chu hmeichheho ang an ni ang a, sipaihote LALPAN an chunga a kut a thin avângin hlauvin an khûr ang.

¹⁷Juda rama awmho chu Aigupta-ho tân chuan râpthlâk tak an lo ni tawh ang a, an hming an lamna apiangte chuan an hlau vang, an chunga thleng tûr sipaihote LALPA thuruat avâng chuan.

¹⁸Chumi niah chuan Kanaan-ho ṭawnga ṭawng leh, sipaihote LALPA hnêna chhechhama thu tiam ṭhînte chu, Aigupta ram chhûngah khaw panga a awm ang a; pakhat chu Boralna Khua an ti ang.

¹⁹Chumi niah chuan Aigupta ram laiah chuan LALPA tân maichâm a awm ang a, a ramrîah chuan LALPA tân lungphun a awm ang.

²⁰Chu chu Aigupta rama sipaihote LALPA tân chuan chhinchhiahna leh hriatna a ni ang; hnehchhiahtute avângin LALPA an la au dâwn si a; tichuan, anin chhandamtu leh humhimtu a tîr ang a, ani chuan anniho chu a chhanchhuak ang.

²¹Tichuan, LALPA chu Aigupta-ho hriat a ni tawh ang a, Aigupta mite chuan chumi niah chuan LALPA chu an hre tawh ang; a ni, inthawina leh thilpêkin chibai an bûk ang a, LALPA hnênah chuan thu an tiam ang a, an hlen bawk ang.

²²Tin, LALPA chuan Aigupta-ho chu a vua ang; a vua ang a, a tidam bawk ang; tichuan, LALPA hnênah an kîr leh ang a, ani chu anmahni ngen thlûkin a awm ang a, anmahni a tidam ang.

²³Chumi niah chuan Aigupta ram aṭangin Assuria ram thlengin lamlian a awm ang a; tichuan, Assuria mite chu Aigupta ramah an kal ang a, Aigupta mite chu Assuria ramah an kal bawk ang; Aigupta mite chuan Assuria mite nên Pathian chibai an bûk tlâng tawh ang.

²⁴Chumi niah chuan Israel-ho chu Aigupta-ho leh Assuria-ho pathumtu an ni ang a, lei lailîah hian malsâwmna an ni ang;

²⁵sipaihote LALPA chuan, “Ka mi Aigupta-hote leh ka kutchhuak Assuria-hote leh ka rochan Israel-hote chu malsâwmin awm rawh se,” tiin mal a sâwm si a.