Read Mizo_Old_version Isaia 21 Bible Online

Isaia 21 - Mizo_Old_version bible

Isaia 21

¹Tuipui thlalêr phurrit chu. Chhim rama ṭhâwngaleivir a kal tlang angin thlalêr aṭangin, ram hlauhawm tak aṭang chuan a lo kal e.

²Inlârna khirhkhân tak ka hnênah hriattîr a ni tawh; vervêk taka titu chuan vervêk takin a ti a, rawktu chuan a rawk a. Aw Elam-ho, kal chho rawh u; aw Media-ho, hual rawh u; an rûmna zawng zawng chu ka tireh vek tawh e.

³Chuvângin, ka kâwngte hi natna nasa takin a khat a, hmeichhe nau vei natna anga natnain mi man ta; benga hre thei lo khawpin na ka tuar a, khaw hmu thei lo khawpin ka mangang a.

⁴Ka thinlung hi a thaw hlawp hlawp a, thil râpthlâk takin mi tihlau va; tlai nêm ka nghahhlelh ṭhin kha ka tân khurhnaah a chang ta.

⁵Dawhkân chu an buatsaih a, râlvêngtu chu an vêntîr a, an ei a, an in a. Mi liante u, tho ula, phaw kha hriak hnawih rawh u.

⁶Lalpa chuan ka hnênah heti hian a sawi a ni: “Kal la, râlvengtu vêntîr rawh; ani chuan a thil hmuh chu sawi rawh se.

⁷Sipai pâwl te, sakawr chung chuang, a kawp zêla kal te, sabengtung pâwl te, sanghâwngsei pâwl te a hmuh hunah chuan ngun takin a ngaithla kiau vang,” tiin.

⁸Tin, ani chu sakeibaknei angin a au va, “Aw Lalpa, chhûnah chuan râlvên bûk chungah hian ka ding fo va, zankhua khuain ka vênnaah hian mi awmtîr fo va.

⁹En teh, hetah hian mihring pâwl, sakawr chung chuang, a kawp zêla kal an lo kal e,” tiin. Tin, amah vêk chuan, “Babulon khua chu a tlâwm ta, a tlâwm ta! An pathianho milem siam chawpte zawng zawng chu leiah tihkeh sawmin a awm ta,” tiin a chhâng a.

¹⁰Aw ka buh vuak sa, ka hruiha buh, sipaihote LALPA, Israel-ho Pathian laka ka hriat chu ka hrilh che u a nih hi.

¹¹Duma phurrit chu. Miin Seir tlâng aṭangin mi au va, “Râlvêngtu, zân hi eng ti nge ni tawh? Râlvêngtu, zân hi eng ti nge ni tawh?” tiin.

¹²Râlvêngtu chuan, “Zîng a lo ni dâwn ta e, zân pawh. In zawh duh chuan zâwt rawh u; hawi leh ula, lo kal rawh u,” a ti a.

¹³Arabia ram chunga phurrit chu. Aw Dedan-ho khualzin pâwl tinte u, Arabia rama ramhnuaiah in riak ang.

¹⁴Tuihâl hnênah chuan tui an rawn la a, Tema rama awmte chuan an chawin tlân bote chu an hmuak a.

¹⁵Khandaihte lakah, khandaih phawi sa lakah leh, thal ngul kawih sa lakah leh indona nasa tak lak ata tlân bo an ni si a.

¹⁶Lalpa chuan heti hian ka hnênah a sawi si a: “Inhlawhfa kum chhiara kum khat chhûngin Kedar-ho ropuina zawng zawng chu a bo zo vang a,

¹⁷thal kâp mi, Kedara thlahte zînga mi chak tak la awm chhun chu, tlêm tê an ni ang; LALPA, Israel-ho Pathian chuan chu chu a sawi tawh si a,” tiin.